Fedores, fregones, represalies y tresgresión

La Nueva España, 2022/08/14

A ún abúlta-y que ser español de dereches ye una condición agotadora nestos tiempos. La ortodosia de la izquierda tamién conlleva  un nivel d’estrés importante (¡que naide te pille falando namás con plurales masculinos!, ¿ónde coimes guardasti la bandera palestina, que nun apaez?, ¡anque nun lo practiques, polo menos has dicir que yes bisexual!…), pero ye más un exerciciu pa salón d’iniciaos, un visáu col que participar d’una determinada sociedá mirífica, feliz na so estructura interna, intransitiva. El militante de la derecha, en cambiu, busca guerra nos espacios públicos porque tien una España idealizada que reconquistar y, con esa misión en mente, suda la camiseta de marca, obreru de la patria, imponiéndose l’asistencia a procesiones, actos militares, visites reales, manifestaciones en defensa de la enseñanza concertada-católica, homenaxes a la bandera y, por supuesto, corríes de toros. Tamos tovía a la espera de descubrir algún español de dereches laicista, defensor de los servicios públicos y ecoloxista. Quiero decir, un español de dereches escandinavu: un unicorniu, usando palabres qu’Amelia Valcárcel destina a otres mistures fenoméniques.

Escribo estes ocurrencies depués de lleer la noticia, magníficamente redactada nesti diariu por Ramón Díaz, de la corrida de toros que se celebró (mal verbu pa esti casu, piensa ún) el pasáu sábadu día 20 en Benia d’Onís. El relatu de Díaz, detalláu y imparcial, pinta l’eventu como lo que debió ser: un actu de militancia política. El periodista atropó crítiques del públicu a l’alcaldesa de Xixón por pesllar la plaza del Bibio y aplausos a los políticos de Vox presentes, que se fixeron ver, según atestigua la semeya, n’asientu de chapona, el correspondiente al círculu de grades de menor diámetru, con derechu a chiscadura de sangre animal y a delicáu muxíu agónicu del bichu a la oreya. Nun cuesta suponer la composición d’un parlamentu salíu d’unes eleciones celebraes in situ, ente los asistentes a la corrida d’Onís: monolíticu como’l de los meyores años de l’Asamblea del Pueblu d’Albania allá pa mediaos del sieglu pasáu, unánime como les Cortes Españoles de cuando la gloria de Sarita Montiel, por nun citar al nefandu.

Cuenta Díaz, tamién, dos perles d’otros tantos aficionaos. “Oléis mal”, dedíco-yos un rapaz de pituitaria esquisita (por eso escapa del metru de Madrid en veranu) a los antitaurinos qu’aguantaben carteles a la entrada del eventu; y “Iros a fregar”, d’un imprecador inespecíficu pero qu’imaxinamos varón tamién, de más solera y alecionando, en llamada autoritaria col imperativu incultu, al sector femenín de los manifestantes, vergüenza y dexenerada perversión d’aquella muyer española que, si pisaba la calle, yera p’asistir a novenes, bautizos, bodes y funerales, y que, fuera d’esos casos, sabía quedar dignamente en casa, fregona callada o vixilante de güeyu rapaz coles criaes, mientres el paisanu la calcaba cola querida o coles pilinguis del prostíbulu de xunto la carretera que lleva pal confesionariu. 

Ún de los organizadores, ganaderu de la zona, reconoció actuar como “represalia” pola suspensión de la novillada del añu pasáu en Cangues, sustantivu qu’hai qu’usar con más prudencia nun país nel que tantes veces s’asoció a detenciones arbitraries, disparos al amanecer y cuerpos abandonaos en cunetes. El rexidor de los pastos de la Montaña de Cuadonga declaró asistir por “llevar la contraria a todo el mundo”, postura con un tresfondu intelectual interesante y emponderable si yes adolescente, pero non si representes los intereses de terceros delantre l’administración, como ye’l casu. Y el parlamentariu asturianu que nun entiende l’asturiano, Ignacio Blanco, disfrutó de “un acontecimientu transguesor y contracultural”, verbigracia, que, a saber cómo, él debió ver, en mitá’l sableru, un toreru trans, desnudu de la cintura p’abaxo, que lleía a voces poesía de Jean Genet acompañáu d’un monu onanista. En fin: ye lo qu’hai, será lo que merecemos.

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Primero que suba la marea

La Nueva España, 2022/08/15

El Muséu Nicanor Piñole, de Xixón, saca, esti veranu, difuntos a la playa, a que dean otru paseín pel sablerón del Muru, que muncho lo y lu echarán en falta. Ellos de “canotier”, traxe y bastón innecesariu, y elles tocaes con “cloche”, “merceditas” al pie y vestíu cola cintura al cadril, vuelven a pisar l’arena con tantu aparatu indumentariu que, a nosotros, resúltanos chocante, incómodu, inverosímil. 

Al pie de la escalerona, una orquestina de ciegos, dos guitarres y violín, animen a la xente a comer un cucuruchu de “maní” o invoquen a Mamá Inés, que tamién “todos los ciegos tomamos café”, y, públicu atentu, un neñu, qu’ellos nun saben que ye roxu y que viste l’albornoz del hermanu mayor, analiza la interpretación con xestu grave que promete un futuru críticu musical o un director xesuita de la Universidá Laboral por venir. Posen na playa, tamién, nadadores del Club Náuticu local del añu ventitantos, caballeros fortachones, de músculu poco definíu pero que promete media hostia de revés definitoria y terminante, vestíos con aquellos bañadores enterizos, esfrexoletaos, tan poco amañosos pa los apuros minxitorios, presumiendo de lo qu’entós yera salú y atractivu y, hoi, predisposición al colesterol y a la diabetes. Baxo les columnes qu’aguantaben poles estructures balnearies, unes neñes, alegres, llasparderes, esperen que Constantino Suárez-yos dea permisu pa movese y volver a escorrese y a chillar y a mirar, burlones, al rapacín seriote que xuzga a los músicos ciegos. La última d’elles, brisa del 26 al borde del Cantábricu, ¿cuánto va qu’alendaría, colos trabayos de l’agonía, les miseries del aire nun box nel hospital de Cabueñes? La ilesia de San Pedro pon-yos el fondu a dos rapacinos metíos nel agua de la oriella, coles piernes cercaes por escuros flotadores inmensos. Ún d’ellos, consciente de que’l futuru espera por él nes paredes d’un muséu de Xixón d’ehí a un sieglu, cuádrase pa la cámara, soldáu infantil y torpe que podía prevocanos la risa si nun fuere que ye l’añu 33, y la ilesia va desaparecer tres veranos depués, y él… Vemos un trisquel de nereides del Rinconín, modernísimes, de bañador que ya marca ñalga, tumbaes na arena y sonriéndonos col atrevimientu de la mocedá enfotada na vida y nos díes por venir, inalgamables y salaos como l’océanu. Y, tamién tirada na arena, una solitaria Venus d’Urbino, más discreta cola mano izquierda, que pa eso lleva ropa de bañu, enseña les piernes rechonches, la gloria de Granda, la flor de Ciares. Y mui, mui atrás, en 1892, ente’l xentíu que fai del sableru’l paséu d’agostu, y que se saluda destocándose o enclinando les cabeces con elegancia protocolaria, y que se ríe, discretamente, de les peisanes del sábanu que cumplen cola prescripción médica metiéndose pal agua ente trapos y bien agarraes a la maroma que cuida un socorrista marutáu de futuru neñu comulgante, ente esi xentíu festivu, una fuxitiva d’un cuadru de Sorolla ofreznos el perfil, serenu y clásicu, y ún tamién quita’l canotier pa saludala, esperando, inútilmente, que devuelva la mirada.

Llevolos la marea a toos. Onde ellos posaben la suela y el tope del cayáu, nosotros, más modernos, más primitivos, posamos la planta’l pie. Pero’l camín que siguimos al borde de la ola moribunda ye’l mesmu, y la marea va borranos, igualmente, el rastru fugaz que vamos dexando. Nun pierda la ocasión y venga usté a vese, neses emotives semeyes de va un sieglu, al Muséu Nicanor Piñole, primero que suba la marea.

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Poner una pica n’Asturies

La Nueva España, 2022/08/04

Acordarase usté: cuando, va doce meses, l’alcaldesa de Xixón decidió (por razones espuries, tamién hai que lo dicir) cancelar, pa en delantre, la feria taurina d’agostu, corrieron los taurófilos a pronosticar una debacle económica. Diben perdese una mano millones porque los toros llamaben, a Xixón, 25.000 persones y esi vacíu diba suponer la ruina del comerciu local. Un añu depués, esti agostu de 2022, la ciudá ta hasta los topes, les terraces de la hostelería a reventar y los xelaeros del Muru pegando palmes de contentos. Si alguién perdió perres cola suspensión, fueron los que veníen a buscales d’alluendi’l Negrón: toreros, criadores y l’empresariu organizador de “las corridas”.

Agora, nuna finca de Benia d’Onís, armaron una especie de plazuca de toros de quita y pon con vistes a un “espectáculu” que cuenta “celebrase” el 20 d’agostu. Benia ye villa pero ye pueblu. Poca infraestructura turística tien p’aprovechar la supuesta caída d’aficionaos d’esi día. Alguién podía pensar que Benia pon la cama pero’l revolcón ye pa Llanes, Cangues o Ribesella. Nin siquiera eso: el revolcón económicu d’eses tres villes ye estacional y ta garantizáu con toros o ensin ellos nel oriente d’Asturies, lo mesmo que pasa en Xixón. El negociu, si lu hai, será, namás, pa la empresa madrileña, Plazas Portátiles y Corrales Raúl Ramírez. Los coches que lleguen a aparcar, pal ayuntamientu d’Onís.

Llámase pica la piértiga rematada na puya, esa punta d’aceru cola que’l picaor pincha al toru en llombu pa sangralu. Pica yera tamién la llanza que cargaben los piqueros que servíen nos Tercios de Flandes allá en tiempos de los Felipes de la casa d’Austria. Cuenten, los que saben d’esto, que contratar piqueros salía-y percaro a Felipe IV porque la profesión llamaba poco a la chavalería (como la de banderilleru ente los mozos asturianos d’agora, por poner un casu). D’ehí lo de “poner una pica en Flandes”, espresión trunfal pa cuando se vencen grandes dificultaes. Lo d’Onís, con esa cutreplaza transterrada (conservará, nes xuntures de les tables, bien de polvu tresmontano) que pudiemos ver, díes atrás, nuna semeya nesti mesmu diariu, quier ser, xusto, eso: poner una pica n’Asturies (por una especie de metonimia na que’l toru ye símbolu involuntariu) depués de l’anulación de los contratos xixoneses y del intentu frustráu, l’añu pasáu, d’entamar una novillada en Cangues. Vuelven a intentalo los Tercios en “traje de luces”. ¿Será Asturies, definitivamente, la so nueva Rocroi?

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Casadielle, ¿qué es?

La Nueva España, 2022/07/30

«Casadielle, ¿qué es?», entrugába-y, micrófonu per delantre, una reportera de la TPA a una turista turolense, según vimos y sentimos, claramente, nes noticies d’ún d’estos díes estivales. La turolense allorió, pero non tanto como podíemos alloriar usté, o yo, o cualquier asturianu al que-y plantearen la cuestión, porque «casadielle», guapina, «no es nada», nun esiste tal cosa.

Entiende ún qu’esta neña, lo más seguro, ye una becaria de fuera que cumple les práctiques requeríes pa obtener un títulu, que lo fai de baldre o por un sueldu miserable y que nun ye d’ella la culpa d’ignorar el revesosu sistema del morfema de númberu de los sustantivos y axetivos astures (-u / -os, -a / es), enforma más caprichosu coles vocales que’l castellán. Y tamién puede ser que la probe, cuando preguntaba «casadielle, ¿qué es?», honradamente buscaba una contestación que la sacare de la ignorancia («Hoy vas a ir a la plaza de la catedral y les preguntas a los turistas qué son les casadielles y los frixuelos. ¡Qué idea más original!», resfrega les manes, contentu, el redactor xefe. Y ella engurria la frente y dizse: «¿Firsuelo? ¿Casadielle? ¿Qué es eso?»). Pero, será porque colos años aumenta la repunancia, abúlta-y a ún qu’estes coses hai que les cuidar y, na televisión autonómica, el desinterés, o’l «casagüelismu» lingüísticu (val too, tas en ca la güela) ye un mal endémicu. Dexando pa prau casos famosos, como’l del campu de requesón onde entrena l’equipu de la capital, ¿por qué lleemos, nos cartelinos subtitulares o nos mapes del tiempu, Uviéu mientres sentimos Oviedo, o vemos Lluanco y dícennos, Luanco, etc., etc.? ¿Qué clase d’esquizofrenia toponímica sufre la TPA? Y casi peor ye cuando ún de los supuestos «graciosos» de los programes vespertinos y nocturnos fai por espresase n’asturiano (porque pa eso sí val: pal chiste fácil y el berríu de la doña Croqueta autóctona) y ponse a pega-y coces al romance vernáculu col remangu del oportunista al que lo mesmo-y da arre que so con tal de que les palabres rimen, a final de mes, con «nómina» (que, d’otra manera, ye rima difícil: ocúrreseme «dómina» y poco más, será por eso’l descuidu). En fin: a la ya consagrada «fabe» súmase agora la «casadielle» promocionada pola televisión públique asturiane.

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

43 palabres desiguales

La Nueva España, 2022/07/23

Esti que firma, ciudadán d’una república literaria notru tiempu gloriosa, sigue visitando llibreríes y faciendo gastu. Va pocos díes, col tique de compra, la encargada de la caxa de la sede xixonesa d’una conocida cadena madrileña del ramu apurriome un marcapáxines, 20 x 4 cm de cartón plastificao con brillu. Nuna cara, una referencia ilustrada a la ciudá: la playa coles casetes pintes a la derecha y San Pedro a la izquierda; al frente, flotando sobre la raya l’horizonte, un poderosu cargueru que busca atraque nel Musel; y, en vez de les previsibles gaviotes, llibros abiertos esnalando percima la mar y faciendo sombra na arena. Digo llibros pero fálta-yos lo esencial pa selo: palabres. Les páxines vense blanques, inmaculaes.

—¡Qué repunante! ¡Eso ye que son miniatures y nun queda sitiu pa escritura!

Seguro que ye eso, seguro. Pero vamos da-y la vuelta al cartonín.

Como ye de razón, lleva impresu’l logo de la empresa, la direción local y el teléfonu: eso pa contra un cantu, ocupando la cuarta parte. Los tres cuartos restantes invádelos una d’eses composiciones gráfiques que consisten n’acorrompinar palabres (les que-yos falten a los llibros-gaviota, piensa ún) de distintes tipografíes, cuerpos (que ye como se llama’l tamañu nel noble oficiu de componedor-impresor) y colores. Son 43. Consiéntame que-y les copie: “Somiedo, osos, Ruta del Cares, gastronomía, parrocha, sidra, bígaros, trasgu, rutas, turismo, sentir, vivir, pixín, paraíso, Quini, centollo, naturaleza, boina, oricios, osos (¿más?), Cantábrico, disfruta, natural, vivir (¿doble ración tamién?), Playa de San Lorenzo, Gijón, Sporting, Asturias, paraíso, Playa de Verdicio, Picos de Europa, andariques, Molinón, xanas, Luanco, fabada, Llanes, Cerro de Santa Catalina, madreña, Ribadesella.” 

—¡Eh! ¡Yo cuento cuarenta!

Vamos a ello. Los tres términos que falten son “La Laboral, Gaspar Melchor de Jovellanos, cultura”. ¿Equilibren? Atienda pal matiz tipográficu: “Gijón, Sporting, Asturias”, en negrita, ocupen el centru del cartón y miden mediu centímetru o un poco más d’alto por, respectivamente, 2.5, 4 y 5 de llargo: lletres grandes, gordes, llamatives. Siguen, en tamañu y notoriedá gráfica, “pixín, rutas, bígaros, fabada, andariques…” “Gaspar Melchor de Jovellanos”, liliputizáu, llega al milímetru d’alto; “Quini”, un Hulk al par d’él, cinco. “Cultura”, dos milímetros; “sidra, cinco”. 

Si meto esti cartonín, por poner un casu, ente les páxines de la poesía de Garcilaso, ¿nun m’acabarán los versos del gran poeta con llamparones a cuenta de tantu bígaru, parrocha, pixín, centollu, oricios, fabada, sidra y gastronomía en xeneral? Si lu uso pa señalar una “soirée” proustiana en casa de la duquesa de Guermantes, ¿consentirán-y la entrada con boina y madreña? ¿Aceptará’l mio apreciáu don Ernesto Jünger ver les sos viriles memories militares invadíes polos berríos machirulos de les grades del Molinón? ¿Qué coime tendrán que ver esos cuarenta términos folklóricos y turisteros cola mercancía (y discúlpeme l’hiperónimu denigrante pero, pamidea, axústase bien al espíritu de la empresa) que s’espón nes meses y nel baldes del negociu? ¿Qué estratexa de ventes sigue la llibrería, a quién quier seducir: a los que ponen el fútbol per delantre’l pensamientu, a los que veneren al mariscu más qu’a la lletra impresa? Pero, ¿esto ye un marcapáxines o un proyectu de mantel pa chigres?Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Abeyando

La Nueva España, 2022/07/14

Sentáu nun bancu d’un parque de Dublín, lleo, nel móvil, les noticies d’Asturies. En Xixón, l’ayuntamientu anuncia que va segar dellos espacios verdes con menos frecuencia col envís de nun-y torcer tanto’l brazu a la naturaleza, y ya hai vecinos que roceen que ye disculpa p’aforrar gastos. A un pasu del bancu onde toi sentáu, l’autoridá dublinesa espetó, nel verde, una estaca con un cartelón nel que reza un xuegu de palabres n’inglés (y en gaélico, pero eso pal que sepa) de difícil tradución, que podía tresladase como “¿Verde alto? ¡Pa qu’abeyen!” (“Long grass? Leave it bee!”: l’infinitu idioma inglés, escribió Borges). Tres abeyines dibuxaes miren, con cares humanes y felices, amistoses, al lector. Runfen, realmente, ensames d’elles pente la pación alto y chiscao de violetes, llecharines, maravíes, margarites… El grupu municipal xixonés de Ciudadanos anuncia petición d’esplicaciones porque “no vamos a consentir que se utilice la excusa de la biodiversidad para efectuar recortes en el servicio, o para impedir que los parques y jardines se mantengan como hasta ahora en buen estado de conservación para que puedan seguir siendo utilizados por la ciudadanía en sus momentos de ocio y tiempo libre”. Hai bien de xente, nesti parque de San Patricio y nos demás de la capital irlandesa, entretenío mirando’l llabor de los insectos. Los parques tienen un atractivu más, son más interesantes y amenos coles obreres acollechando polen. Nel patiu de la Christ Church, la vieya catedral protestante, instaláronse caxellos, y tamién se ven nunos xardininos de detrás del Castiellu de Dublín. Y casines pa páxaros, paez ser que colocaes tamién pol City Council. Nun va tanto, na periferia del parque de Moreda en Xixón, nos tarrenos que quedaron muertos al sur del Palaciu de Xusticia, había xilgueros. Depués, los empleaos municipales segaron. Adiós xilgueros. Abeyes, xilgueros y Ciudadanos: tres especies en riesgu en Xixón. Tovía tamos a tiempu d’ayudar a un par d’elles a salvase. 

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Renta y simpatía

La Nueva España, 2022/07/01

Ún ya nun sabe si lo soñó o si realmente hubo un tiempu, tampoco tan remotu, cuando la renta media de los asturianos yera la envidia del restu d’España, daquella que les muyeres-y pedíen al carniceru, na Plaza’l Sur de Xixón:

—Dámelo de lo bueno, que’l mi hombre trabaya n’Ensidesa.

Agora, según datos frescos del INE, les cases asturianes tán ente les que menos perres meten d’ente les de tol Estáu y la renta anual por persona (entiende ún que bruta), al norte del Negrón, ye de 12.861 euros, lo xusto pa nun morrer de fame y pagar Netflix.

L’INE diz, tamién, qu’una de cada cinco persones coles que se cruza usté na calle o ye probe o se pon de perfil pa evitar la truñida de la miseria. O, igual, cuatro de cada cinco persones coles que nos cruzamos nun saben que somos probes o que nos ponemos de perfil: catalóguese usté. 

Col obreru industrial, marchó l’abondanza; col camareru, llegó la probeza. Nel ranking español de les economíes familiares, Asturies fue baxando puestos, añu a añu, al empar qu’Otea, insaciable y lloramingona, diba ocupando l’espaciu públicu y d’influencia política que dexaben los sindicatos tradicionales. La épica del mineru indomable sustitúyela la crítica en TripAdvisor al camareru poco servicial: nun-y busque otra esplicación a la decadencia del país. 

Estos díes tán ya al caer los calderaos habituales de turistes estacionales (“¡Ej que Ajturias ej muy bonita!”), porque pa eso diz otra encuesta reciente (electomania.es) qu’esta ye la comunidá más simpática pal conxuntu d’España. Cuanto más probes, más simpáticos, ¿qué-y paez?, ¿habrá relación?. Cuando había más hollín nos tendederos, menos banderes azules nes playes y yéremos unos babayos antipáticos que lo echábemos a voces en Valencia de don Juan o en Benidorm, nun llegaben tantos turistes: daquella, salíemos los d’equí a gastar, ¿acuérdase? ¡Sería por perres! Agora, tendremos que-yos agradecer a los que vengan, otru veranu más, que nos consoliden los sueldos de miseria y el trabayu precariu. Nun sé usté, pero yo cambiaba simpatía por rentes dignes. 

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Los comunistes y el motor d’explosión

La Nueva España, 2022/06/24

Si usté nun vive en Xixón, pueser que nun entienda la polémica circulatoria del Muru: que si unos lu quieren peatonal, que si otros con doble vía pa los coches… ¿Quién son esos unos y otros? Vaya usté al trazu gordu y verá qué bien lo pescancia. 

La Nueva España, declaraciones, el sábadu 11 del mes en cursu, de Manuel Robledo, presidente de l’asociación que defiende la circulación de coches en doble sentíu: diz él que los del PP local, cola intención de recaudar perres pal aval requeríu pola xusticia pa que se proceda, darreo, a restablecer la doble circulación, “pusieron una carpa en la Plaza del Generalísimo”. Ya quedó too claro. Esti mes cúmplense 43 años de magar que’l Parchís (como tolos xixoneses llamamos, de siempre, a esi espaciu públicu) pasó a ser, oficialmente, Plaza del Institutu. Hasta’l periodista que redactó la noticia consideró procedente poner al llau de Plaza del Generalísimo, ente paréntesis, “el Parchís”, porque más d’ún, y de diez mil, nin sabrán ya qu’esistió tal placa en Xixón nin ónde se podía lleer. Manuel Robledo, persatisfechu con que’l xuzgáu obligue al ayuntamientu a recular, enguiza a otros grupos de descontentos a qu’imiten a Stop Muro porque “Gijón siempre ha reaccionado ante posturas autoritarias y dictatoriales”. Ya. Pero Plaza del Generalísimo. Debe ser que l’autoridá y la dictadura molesten según d’ónde procedan.

Al final, too esto son perres, de tolos xixoneses, tiraes a la mar porque, evidentemente, el Muru va acabar siendo vía de sentíu únicu ensin que nos vague muncho. El diseñu (presuntamente temporal) del Cascayu podía tener contestación pero l’usu, non. A la mayoría de los ciudadanos (que ye verdá que nun viven na Avenida de la Costa y nun se ven afectaos pol desvíu del tráficu, qu’algún camín tien que llevar) interésa-yos más un paséu ampliu que los problemes de les rentes altes del este de la villa pa baxar al centru en coche. La de Stop Muro nos xuzgaos ye una victoria pírrica porque, a cambiu del placer partidista (y fugaz) de ver gachar la cerviz a esti Gobiernu local de rojos, va haber dos obres, casi consecutives, onde bien podía haber namás una, y a quien más van a molestar va ser, xusto, a los que ganaron el pleitu. 

Unos meses enantes, en carta publicada tamién en La Nueva España a raíz del fallu xudicial qu’ordenaba volver al pasáu precascayil, Manuel Robledo, trunfante, acusaba a les autoridades municipales de declarar “la demonización y persecución al coche –pura ideología comunista”. Ún (¡que vaya dicho per delantre que nin ye comunista nin votó a l’actual alcaldesa, ya la sufrí abondo de xefa cuando fue conseyera d’Educación!) nun entiende por qué razón el motor d’esplosión ye enemigu de los koljoses, y viceversa. El mesmu Aurelio Martín, conceyal de movilidá y militante comunista, afirma tener un Volkswagen Golf na so declaración de bienes, colgada na páxina web del Ayuntamientu. ¡Nun sé de qué diba tener escrito Solzhenitsyn si’l programa soviéticu llega a ser acabar col tráficu nel centru de Moscú! Y tampoco me paez que-y meta munchu mieu a la sociedá gritar: “¡Que vienen los comunistes… en bicicleta!”

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Fobies y vampiros

La Nueva España, 2022/06/14

Va poco enterémonos, nesti diariu, d’un notable casu de fobia de chigre, que non al chigre. Un reputáu psiquiatra d’Uviéu, ya nel retiru, dio a conocer la historia d’un hosteleru que tuvo que tratar, años atrás, porque desarrolló pánicu a echar sidra. Podemos asegurar que nun esiste literatura al respectu, el paciente documentáu por Ángel García Prieto ye’l primeru conocíu de, vamos llamalo asina, siceraescantofobia. Ún ta tamién por afirmar que, xunto col mal de la rosa, descritu pol doctor Gaspar Casal, allá permediáu el sieglu XVIII, na so Historia natural y médica del Principado de Asturias, esta siceraescantofobia ye la segunda aportación pública del país al inmensu catálogu de les dolencies humanes. Pero hai más. Pa esto de les fobies, en particular, somos un pueblu enforma dotáu, perespecial. La seña d’identidá más característicamente astur bien puede ser, xusto, la fobia a la nuestra propia esistencia, verbigracia ipsiofobia. D’esto tien tratao abondo Xuan Xosé Sánchez Vicente. Autodenigrámonos con saña adelantándonos a cualquier posible detractor foriatu. Nes romeríes, berramos a coru un poema andaluz que diz “Yo soy un hombre del sur” (¡hasta les muyeres lo canten!) y celebramos feries sevillanes a la oriella del Piloña o del Nalón. Tolo nuestro ye menor y despreciable al par de lo estramontano y nun hai mayor orgullo qu’arrenegar d’ello. “¡Si por mí fuera, embaldosaba Quirós entero!”, dicíame, va tiempu, un sindicalista natural d’esi conceyu, y pronunciábalo enseñando los dientes con rabia lupina, destilando un rencor inespresable contra les caleyes, los regatos, les lloses y les corripes de la infancia presindical y vergonzante. Tapinofobia. Nun sé si les ansies de Canteli por afuracar el Naranco serán una variante de la patoloxía del quirosanu. Pero la quintaesencia de les ipsiofobies astures ye la referida a la llingua, vamos pone-y  vernaculaloquendifobia o, por ser más amañosos, bablefobia. Esti problema mental, prácticamente desconocíu nel restu del mundu, ye endémicu pal norte del Negrón, como lo fuere, tradicionalmente, la tuberculosis. Ún nin siquiera descarta un vínculu ente les dos coses: puede llegar el día que la ciencia demuestre que la bablefobia ye consecuencia de la presencia nos organismos del bacilu de Koch, col qu’usté y yo nos cruzamos cien veces al día na calle. Seya o non cosa de microorganismos, la bablefobia tien infestaos los medios de comunicación, la Universidá, l’obispáu y hasta la Xunta Xeneral. Ye’l plumeru de la pampa de la clase política astur. Bona parte de los parlamentarios autonómicos sufren esti mal insidiosu que, polo que sabemos, nun remite con tratamientu conocíu ningún. A esi respectu, consiéntame un escursu: esti que firma tien un argumentu pa una novela que nunca va escribir. Titúlase “Tista, el vampiru bablista” y la cosa va asina: Bautista ye un rapaz de Bimenes que viaxa, de turismu, a los Cárpatos. Una nueche, dexa abierta la ventana del hotel en Sibiu, cuélase-y un vampiru y muérdelu. La podrez vampírica mézse-y, na sangre, col asturianismu intrínsecu a los yerbatos y, de vuelta pa la tierrina, militante ya nes files de los non-muertos, pescuezu que muerde, cuerdes vocales que se pasen a la bablefonía. Consciente d’ello, Tista ponse a morder, desafranáu, diputaos de la Xunta Xeneral, que, darreo, aparte d’echar caniles, asóciense a la Xunta pola Defensa de la Llingua. Teresa Mallada, Susana Fernández o Ignacio Blanco, esblanquiñaos y siempre de gafa escura, empiecen a intervenir, en sesiones vespertines, nel más estrictu y académicu asturiano normativo. Esto despierta la rocea nel grupu socialista, que gusmia peligrosamente posible una iniciativa mayoritaria en favor de la oficialidá que lu desmazcarite. A Adrián Barbón tocaría-y el papel del cazavampiros Van Helsing, claro, pero, nesti puntu, toi atascáu. Puedo velu con una estaca na mano, sí, pero cuesta imaxinalu clavándo-yla a Teresa Mallada, siendo l’home pacíficu que ye. 

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

Noticies orientales

La Nueva España, 2022/06/06

Una xixonesa, indignada, publicó en Twitter que’l cura que dio la misa de la una y media del día 29 de mayu na basílica de Cuadonga avisó de que “las mujeres que no perdonemos las infidelidades de nuestros maridos vamos al infierno”. Yo nun sé si será verdá ninguna de les dos coses (lo de la homilía y lo del infiernu), pero una abúltame más verosímil que la otra. 

La víspora, el 28, la Hermandá Nacional Monárquica de España impúnxo-y, a la figura de madera y poliéster que s’esibe nel covarón, popularmente conocida como la Santina, el Lazo Dama de la Gran Cruz. Asina, la citada figura de madera y poliéster entraba a formar parte d’un grupu selectu d’imáxenes VIP, feches en distintos materiales, distinguíes con tal galardón, como la ceutí Virgen de África o la sevillana Divina Pastora. Incomprensiblemente, la figura astur nun dio les gracies. Na semeya publicada en La Nueva España, vense, nel momentu trescendental de la imposición, cuatro paisanos canosos, tres d’ellos seglares (los representantes de la hermandá monárquica) y l’otru clérigu uniformáu, toos con cares graves, circunspectes, protocolaries. El clérigu, delantre un micrófonu, camentamos qu’en funciones de portavoz de la figura de madera y poliéster, cómodu como’l que ta en casa, mete una mano nun bolsu de la sotana, buscando la inspiración. 

Volviendo al día 29, en Cangues, la estatua de don Pelayo amaneció malvistiendo una camiseta del Real Madrid al otru día de ganar, l’equipu de la capital d’España, la última copa de la Champions (última pa siempre). Nun ye novedá: ya lu marutaron de madridista manes anónimes n’ocasiones anteriores. Hai otres estatues vestibles en Cangues: l’emigrante que mira pal puentón o la vieyina que paez querer dir pa misa a la puerte la ilesia. Pero resulten poca cosa pa la camiseta del Madrid. A fin de cuentes, son inconfundiblemente asturianos: una aldeana y un probe al que la necesidá echa pel mundu alantre. El Real Madrid, un club “señor”, nun se puede rebaxar, ¡y menos mal!, a vestir esos cuerpos indignos, por más que broncinios. L’equipu del alma del nacionalismu español nun merez menos qu’un rei, salvador visionariu d’esencies nacionales y padre de la gran patria de la xente del barriu madrileñu de Salamanca más que de la tierrina mísere de la paisana de la toquilla o del mozu de boina y maleta de la ribera del Sella.

Dalgo pasa nel conceyu de Cangues, piensa ún. Anda per ende xente raro, xente que diz y fai coses rares. Denígrase a un rei que, en realidá, nun fue rei y los monárquicos condecoren una muñeca de madera y poliéster a un pasu del púlpitu onde pueser que se mande al infiernu a les muyeres rencoroses, que nun perdonen les infidelidaes del paisanu… ¡Cangues, Cangues…!, “¿cómo no te voy a querer?”

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.