Estadístiques

La Nueva España, 28/10/17

La conseyería d’Educación presentó, esti miércoles pasáu, un informe sobre la conflictividá escolar en Secundaria y los resultaos nun meten muncho mieu. Un 83 % de los alumnos encuestaos dicen que nunca se pegaron nel centru onde estudien y un 93 % que nun lo fixeron a la puerta o de camín. El conseyeru diz, con razón, que la vida en clase puede vivise, y a mi paezme que fuera clase tovía meyor, visto que les pelees son más escases. Seguro que ye una intuición que toos teníemos: esi pitu adolescente a la entrada l’institutu serena más qu’una ecuación de primer grau delantre la pizarra.

Nun pongo d’exemplu les de segundu grau o les integrales porque, según el mesmu informe, los qu’engorden la estadística de les amarraces son los repetidores y otra castra, misteriosa, indefinía, a la que s’alude cola críptica espresión «dependiendo de la procedencia». Tará comigo en qu’esi datu, la catalogación precisa d’una parte de los alumnos conflictivos en función de la «procedencia», tiénenlu los xestores del informe, porque, si non, nun venía a cuentu nin siquiera facer alusión a tal grupu anónimu. Que nun nos revelen esa procedencia puede llevar al ciudadanu mal pensáu (menos mal qu’usté y yo nun figuramos nesa nómina), primero, a suponer, nos responsables de la conseyería, prexuicios de corrección política que los faen amordazar la realidá y, depués, a elucubrar maldaes:

—¡Claro! Son los alumnos procedentes de Cataluña y nun lo quieren decir! —, ponse’l patriota de bandera en tendederu.

Nun sé. Igual sí. O igual non. ¡Vaya, ho!, queda ún mal a gusto, con ganes de saber.

Dexando pa prau los pegones de procedencia amazcaritada, queden los repetidores. Lo de repetir, ¿ye causa o consecuencia de pegase? Quiero decir: ¿pégueste más porque yes repetidor o repites porque te pegues más? Yo planteé-ylo, nel institutu onde trabayo, a algún destacáu miembru de la categoría referida y sumióse nuna confusión facialmente manifiesta. Les dos circunstancies (fracasar nel boletín de notes y agredir a los compañeros) perdíense-y no más fondo del túnel de la memoria y entemecíense nun remotu cuadernu caligráficu infantil, fechu cábala d’escarabayos autistas y puercu de la sangre de la vecinina de pupitre mordida nun deu pa quita-y los rotuladores. Abultóme llabor fatu busca-y la costura a esa túnica inconsútil: suspensos y hosties yeren cuerpu y alma, o meyor alma y cuerpu, polo menos nel casu del repetidor por mi consultáu.

En fin: nun quiero ignorar otra de les estadístiques ofrecíes pola encuesta de la conseyería d’Educación: un 98 % de los docentes diz que se lleven bien ente ellos y coles families de los alumnos. Ye resultáu propiu de referéndum norcoreanu…

—¡O catalán!

Ta bien, o catalán, lo qu’usté quiera. Ye resultáu propiu de referéndum catalán, y por eso sospechosu. Trenta y un cursos llevo dando clase y asistí a mui poques engarraes interdocentes o mistes (docente versus familiar d’alumnu), pero alguna haila. De toles maneres, y como nun veo por qué los profes nos tenemos que querer más ente nosotros de lo que se quieren ente ellos los afiliaos a la FSA (por poner un casu), el datu del 98 %, aisláu, tien l’únicu interés de constatar que la hipocresía ye directamente proporcional al nivel d’estudios y manifiéstase en maxestá ente los titulaos universitarios.

Anuncios

Un remediu

transferencia_6º_A 1

Atlántica XXII, nº 50 / mayu de 2017

Comecoraes: el términu úsase en Xixón pa referise a esa persona inaguantable que tol día protesta y se quexa y reburdia y arreniega… Con independencia de qu’esistan estadístiques establecíes por razón d’edá o sexu, la esperiencia diznos que’l comecoraes tipu ye varón y retiráu. La modalidá entonativa que lu caracteriza ye la esclamación:

—¡Cagonsuputamadre! ¿Quién coño ye l’hijoputa que-yos abre’l portal a los cabrones de la publicidá?

—¡Mecagondiós…! ¡Como garre al dueñu del perru que nos mexa la fachada va acordase de mi…!

—Esto nun tien igua. ¡Cola mierda de políticos que tenemos, tenía qu’haber una peste pa llevalos a toos per delantre!, ¿oíste?

—¡Nun hai más que lladrones! ¡El que nun roba ye tontu! ¡Quién me mandaría a mi nun m’afiliar al sindicatu d’aquella que…!

—¡Una ETA ye poco! ¡Una en cada comunidá de vecinos ye lo que facía falta!

—¡Ná! Ya nun se puede nin comer. Nun te venden más que mierda. ¡Ye pa matanos a toos, y primero a los que cobramos la pensión, lo que yo te diga!

El comecoraes nun apaez como resultáu d’una violenta mutación producida la nueche del tránsitu a les clases pasives: de ninguna manera. Hai un procesu evolutivu, llargu, inapreciable en plazos de tiempu pequeños, una especie d’aprodecer espiritual calmoso, vexetativo, qu’arrinca ya na edá viril pero que da’l frutu maduru del malhumor más destiláu cola llegada de los díes de la folganza ensin ilusiones.

La que más nota, con pesar, la plenitú del comecoraes ye la muyer. Los años productivos dáben-y a la vida conyugal la tregua propia del horariu de trabayu. Agora, l’Estáu llíbrase del comecoraes empaquetándo-ylu a ella a tiempu completu. Ábrese-y per delantre una vida nueva y, al empar, vieya: la magaya que queda depués de mayar el matrimoniu.

—¡Ai, fía! Ramón ta fechu un comecoraes. Desde que lu retiraron, nun hai dios que lu aguante. Por too me protesta, too-y paez mal… Y, amás, como nun ye de chigres, tol santu día lu tengo trevesáu per casa. Va acabar comigo, fía.

L’amiga acercó-y la cabeza, confidencial:

—¡Esmigáya-y un pocoñín d’orfidal na comida!

—¡Home, Pepita!

—Unes arenines, muyer. ¡Ya verás qué cambiu!

—¿Y si-y sienten mal?

—¡Eso nun mata a naide, muyer! Unes arenines namás, tu prueba y ya me dirás.

—Pero… y amás… yo nun tengo orfidal. ¿Danlo na farmacia sin receta?

Pepita soltó’l carru la compra y, d’un bolsu de la chaqueta, sacó un pastilleru de plata:

—Toma. Doite yo dos. Si ves que va bien, vas al médicu y cuéntes-y que duermes mal.

***

Recetariu del pensionista:

Cena del día 1. Sopa de cocíu del pensionista: una zanca de pitu, garbanzos, un güesu de cañada, una cebolla, una cenahoria, un puerru, fideos, agua, aceite, un plizquín de sal y 0,25 miligramos d’orfidal.

Cena del día 2. Puré de patata del pensionista: mediu kilu de patata pa cocer, un litru d’agua, mantega, un vasu lleche, sal y 0,5 miligramos d’orfidal.

Comida del día 3. El platu la güela del pensionista: un chorizu del altu Aller, patata pa tostar, güevos camperos, un pimientu verde, sal. Espolvoriar los güevos tostaos con sal y una pastilla d’orfidal d’un miligramu.

***

—¡Vaya diferencia, Pepita!

—¿A que sí?

—¡Home, bueno! ¡Como de la noche al día! Ye otru paisanu, nun tien ná que ver. Quédase así, delantre la tele, apigazadín, apigazadín… ¡Si hasta puedo ver el telediariu de la Sexta tranquila!

—Claro, muyer. Si ye que, si non, nun pue ser, nun hai quien viva.

—Y, amás, que tamién ye en beneficiu d’él, ¿oíste? Que vive más tranquilu.

—Claro, muyer.

—Lo que pasa ye que tengo mieu que se dea cuenta. Anda estrañáu de que-y entre tanto’l sueñu.

—Tu di-y que ye l’astenia primaveral.

—Ye capaz de dir al médicu.

—Pues que vaya. Eso pasóme col míu. Fue col cuentu de que debía tar anémicu y el médicu tomólu por osesivu y empezaron a entrame les recetes en casa como per un grifu, fía.

—Pero, entós, tu, ¿cuánto lleves dándo-ylo?

—A la selmana de quedar pensionista. ¡Home, bueno! ¿Tu sabes qué aires traía? Qué va, aquello nun podía ser.

—¿Y cómo se t’ocurrió, muyer?

—Nun se m’ocurrió a mi. Comentómelo Feli, la del camioneru.

—¿La del que morrió l’añu pasáu?

—Esa.

—¡Ai, por Dios! ¡Nun tendrá ná que ver!, ¿eh?

—Qué va. Morrió por un paru cardíacu. O eso fue lo que contó ella.

—¿Y nun-y ficieron l’autosia?

—¿A un pensionista de setenta años? Qué va, muyer.

Respiraron.

Con andares pesadonos, torpes, oscilantes, acercábase-yos un paisanu achepaducu cargando una bolsa del supermercáu. Saludáronlu.

—¿Qué, Ladio?

Nun contestó. Pasó, calmosu, al llau d’elles como si nun les viere: los güeyos inespresivos espetaos nun puntu del inesistente horizonte urbanu.

Les muyeres, en silenciu, cambiaron una mirada cómpliz. Depués, pasaron la vista alredor, peles cuatro calles confluyentes na esquina qu’ocupaben. Los pocos varones alopécicos que transitaben per aquel decadente barriu de pensionistes arrastraben les sueles de los zapatos como zombis, irracionales y al tiempu ansiosos, llamaos, incomprensiblemente, pola comida de la muyer como nunca-yos pasare en vida… na vida anterior.

Independencia

La Nueva España, 14/10/17

El bachilleratu antiguu, aquel de les reválides, ta sobrevaloráu. Fixéronlu’l presidente del Gobiernu asturianu y el del Gobierno español y ningún de los dos ye a entender les palabres que pronunció, el martes 10, el del Govern catalán. Javier Fernández aprueba la petición d’aclaraciones de Rajoy sobre si hubo o non declaración d’independencia porque, diz valientemente, «yo creo que nadie lo sabe». Bueno, a ver: tampoco vamos insultar la intelixencia de los demás. Lo que se dixo, voi esplicá-ylo yo (que soi del BUP, como Puigdemont) p’aforra-y la humillación de que-y lo espliquen los de la CUP, que tán acabantes salir de la LOMCE, poco más o menos, y esos sí que lo entendieron bien y por eso tán col focicu retorcíu.

«Assumeixo […] el mandat del poble…», «asumo […] el mandatu del pueblu pa que Cataluña se convierta nun Estáu independiente en forma de república.» Dexando pa prau la validez d’esi mandatu y la discusión de si’l presidente puede sustituir al parlamentu nesti tipu de decisiones trescendentales, ye evidente que «asumir» y «declarar» son coses distintes. Con esa asunción, podemos entender, tolo más, que Puigdemont comprométese a facer la declaración algún día o a echar a rodar el procedimientu pa que’l parlamentu catalán lo faiga: ya veremos. Pero’l martes nun hubo declaración d’independencia. Lo qu’oímos fue una notificación, por boca del presidente, de que se daba por enteráu de los resultaos del referéndum (o lo qu’usté quiera) del día 1 y de les obligaciones a les que quedaba obligáu en consecuencia. Y puntu. Cuando, al momentu siguiente, pide la «suspensión de los efectos de la declaración d’independencia», ta faciendo comedia, porque nin hubo declaración nin efectu consecuente de ningún tipu. Pero nun sé qué me da ofrece-y estes esplicaciones a don Javier Fernández, nun acabo de creer que-y faigan falta. Él ye home casáu y digo yo que, el día que se comprometió cola muyer, declararíase, nun-y propondría asumir un mandatu conyugal… ¡Bueno, a saber!

Por si val d’algo, sustento la mio autoridá na materia que tratamos nun fechu autobiográficu: yo formé parte, munchu tiempu atrás, allá pela década de los 90, d’una declaración independentista que se celebró n’Uviéu, concretamente en casa de la escritora Berta Piñán un fin d’añu. Yéremos un puñáu d’amigos (amás de l’anfitriona, y respetando rigurosamente orde alfabéticu d’apellíos, acuérdome de la presencia de Bello, Cortina, Duque, Forga, Iglesias, Mori, Prieto, Recio y un servidor, Rodríguez: si me falta alguién pído-y sinceramente que perdone la memoria floxa que me caracteriza) y la fiesta, a saber cómo, ente turrón, vinu y pedantería xuvenil, derivó, nel momentu de les campanaes, nuna solemne declaración d’independencia p’Asturies, copes n’alto. Hai que reconocer que l’actu tuvo poca trescendencia política, nin siquiera Sidra El Gaitero corrió a llevar la sede social pa León, y eso que’l brinde féxose con cava.

Yo, sinceramente, aconséyo-y a tol mundu que faiga una declaración d’independencia polo menos una vez na vida. Munches más tampoco porque, cola repetición, la cosa pierde efectu (pasa como col hara-kiri: el méritu ta na singularidá del actu). Ún puede independizase del país, sí, pero tamién de la comunidá de vecinos, del Sporting de Xixón, de la empresa onde trabaya o de los medios de comunicación. Don Javier Fernández, por poner un casu, ta tovía a tiempu d’independizase, como presidente asturianu, del secretariu xeneral del PSOE. Tampoco fai falta convertilo nun acontecimientu públicu. Basta que, na intimidá del so despachu, nel Palaciu Mariellu, llevante dramáticamente la mano derecha delantre un espeyu (apuesto perres a que lu hai) y se declare independiente y insumisu. Sí: ye verdá que, más pronto o más tarde, el teléfonu va sonar con una llamada procedente de Llaviana y va haber que lu garrar. Pero, mientres… ¡qué momentos!

Disparando a les llargateses

cartel polesu

Seré yo (claro que soi yo, seguro), que nun veo, nel cartel qu’anuncia la Oktoberfest polesa, les razones d’alarma y escándalu que sí ven los conceyales de Somos y d’IU, pa los que «atenta gravemente contra la igualdad y ofende a las mujeres», amás de que les característiques del anunciu «perpetúan y fomentan los estereotipos sexistas que son la base de la violencia contra las mujeres».

Si se quier torcer el focicu pol eventu, abulta causa bastante lo innecesario d’otra fiesta foriata, desvinculada de los ciclos agrarios del país, copiada al serviciu del continuum consumista. Pero gravedá sexista o fomentu de la violencia contra les muyeres, si los hai nesti casu, a mi escápenseme. Ya lo sé, nun ignoro que puedo resultar sospechosu: un paisanu nesa etapa de la vida aceleradamente fuxitiva que la delicadeza social designa como «mediana edá» y que precede a esa otra, pa la que ya nun esisten paños calientes, que s’espresa cola etiqueta despectiva de «viejo verde». En fin: contra la bioloxía lluchen namás los fatos y fatu hai que ser, tamién, pa espresar opiniones que nos mazcariten biolóxicamente. Asina que:

Yo, l’únicu fantasma que soi a ver nel cartel de la Oktoberfest de La Pola ye’l del aburrimientu. La semeya ye un bostezu gráficu. Quiero pensar que ta sacada d’ún d’esos repositorios impersonales d’Internet onde lo que más se valora ye un enfoque nítidu. Por dir descartando coses, nun fui a atopar nella matiz sexual indecente que pudiere alterar al padre Escrivá de Balaguer nin siquiera nos sos díes de más estricta penitencia pascual (a nun ser que te pongan verracu les puntillines y los bordaos camiseros a consecuencia d’alguna imprevista visión colorada escucada per casa nes inocentes carreres de la infancia, pero desconozo les biografíes de los conceyales polesos como pa tener camientos a esi respectu). Pulcritú de tendera conforme a norma ISO ye lo que tresmite la neña que nos apurre les cerveces. Y nel fondu borrosu, ente castañales de les Indies, apreciase la violencia d’un congresu de pedagogos LOMCE.

Dizlo la indumentaria: la rapaza, de polesa tien poco, ye una inmigrante bávara que s’esfuerza por integrase na sociedá sierense, por ser un miembru (umm…) productivu y cotizante. ¿Refuerza esta imaxe los estereotipos femeninos? ¿Contribuye a encaxellar a la muyer nun determináu rol laboral denigrante, xenéricamente discriminatoriu? Nun sé: d’un llau, a mi los/les camareros/es nun me paecen casta paria, gústame que me tuteen y que charren comigo con confianza, nun sufro d’ínfules de señoritu distante que ve un sirviente asociáu a cada bandexa y a cada servilleta; d’otra, yo nun asocio necesariamente mostrador a muyer, casi veo más camareros que camareres per onde paro (tamién ye verdá que suelo salir de día: igual los conceyales esmolgaos tienen otru horariu o visiten otros locales, qué sé yo).

Y, a fin de cuentes, ya sabemos que, cola perspectiva actual, resulta inxusto, triste y un estereotipu sexista, por exemplu, que les institutrices decimonóniques fueren siempre muyeres (y muyeres, pa encima, condenaes a la subordinación, la humildá y la soledá), pero eso nun ye razón pa que los rapacinos nun puedan ver «Mary Poppins» amás de «Pipi Calzaslargas»… nun sé si m’esplico.

Que’l sueñu de la razón produz monstruos. Que, si gastamos la munición disparándo-yos a les llargateses, nun nos van quedar bales pa cuando lleguen los cocodrilos.

Razones pa marchar d’España

La Nueva España, 30/09/2017

«Si hay algunos que no están a gusto viviendo en España, pueden buscar otro país que les acoja.» Son palabres recientes de Gabino de Lorenzo, delegáu del Gobiernu español n’Asturies. Dexando pa prau la ofensa gramatical que supón el leísmu, la propuesta de don Gabino tien una vuelta rompedora, positiva: si tolos ciudadanos descontentos con España-y fixeren casu a De Lorenzo, el país podía llegar ensin esfuerzu a una situación de paru cero, más tovía, al pluriempléu obligatoriu y por decretu pa los pocos que quedaren residentes. Porque les categoríes d’afectaos pol desafectu son múltiples, van alluendi del fervor nacionaliegu catalán: tán los republicanos, los laicistes, los antitaurinos, los amantes del silenciu…

Yo mesmu, si me pongo a numberar toles partes, aspectos, coses y facetes d’España que m’ofienden, tengo falta de munchu más espaciu del que me facilita esta columna. Por poner un casu, nun me gusten les provincies de Badajoz o Murcia. Nun me gusta’l desiertu de Los Monegros, tampoco la ciudá de Huelva o’l barriu del Monte Naranco, con tanta cuesta p’arriba y p’abaxo. Nun me gusten los arrebatos de les procesiones de Selmana Santa (nacíes pol esfuerzu de camuflar sangre morisca o marrana), los sanfermines navarros, los moros y cristianos llevantinos, la voracidá pulpera gallega, el Rocío andaluz o’l día de la Santina nuestru. ¿Y los premios Príncipe / Princesa d’Asturies? ¡Una enervante tontería protocolaria! Espántenme les mantilles tenebroses y los caperuchos kukluxklaneros de les cofradíes. Indígname la bobada foriatera de poner un pañuelu alredor del pescuezu na fiesta de Les Piragües (¡Dios, Les Piragües…!). Pónenme los pelos de punta les talles polícromes del barrocu castellanu contrarreformista, técnica virtuosa al serviciu del espantu. La Dama d’Elche véola como un muñecón y la obra de Dalí, un timu. La jota, pal que-y preste. El flamencu repúname hasta la voltura y la sardana fáiseme un coñazu insoportable. Del chistu, nun me merez la pena nin falar. La zarzuela, en xeneral, caime como una patada na tripa. Nun puedo pasar de la tercer páxina de les noveles de Pérez Galdós, toi naguando pola xubilación namás que pa poder llibrame de la condena anual que me supón Los santos inocentes, y los esquisitos de la Xeneración del 27 déxenme fríu como un tocín. El cine casposu de la Transición paezme porno social. Resúltenme antipáticos los Reis Católicos y tola so descendencia Habsburgo, y otro tanto Felipe V y tola so descendencia borbónica, lo mesmo la lexítima de los sepulcros de Trieste que la ilexítima que permanez nel tronu en Madrid. Nun tengo’l menor apreciu pol legáu árabe hispánicu, y el Cid, depués de dedica-y les pertinentes lectures profesionales, preséntaseme como’l xefe d’una banda de matones mercenarios, racista y avariciosu (y, a too esto, independentista). Les maneres empalagoses y afeminaes que son marca profesional del cleru español (probablemente del cleru universal) prodúcenme un noxu insuperable. Nun me gusta’l Real Madrid, tampoco el Barça. Ofiéndeme esa afición castiza y paleta poles banderes, lo mesmo me da que representen a un equipu de fútbol, al Reinu, a una rexón, a un partíu políticu, a un bancu, a una cadena de gasolineres o al orgullu gay. Pónenme frenéticu la impuntualidá española, el supuestu «gracejo» andaluz o la babayonería playa. Y les voces: ¡esa puñetera zuna de les voces! Nun soi pa col ruíu ambiental d’esti país incapaz de la introspeción. Los canales de televisión n’abierto son un delitu y los de pagu, una estafa. L’atrevimientu col que gran parte de los ciudadanos presumen d’agrafía tenía que tar penao nel códigu legal. Nun puedo cola presunción característica de los ricos nin cola dignidá hipersensible de los probes. La desvergüenza y la combayonería rastrera pa colos líderes que demuestra la clase política (con alguna digna escepción) ya va tiempu que me quitó les ganes de votar. Atáquenme la vista’l traxe ridículu de los toreros y la oreya, los clarines y timbales. ¿Qué puedo decir del disgustu estéticu que me producen les places de toros, en particular esti pegote fuera de sitiu que tenemos en Xixón, o los perfiles vacunos d’Osborne nes carreteres asturianes? ¡Y qué ascu les berenxenes en conserva d’Almagro! Y… y… y…

Pero, si me tengo que quedar con algo d’España que me resulta insuperable, absoluta y radicalmente indixerible, son los delegaos del Gobiernu enguizaores, como Gabino de Lorenzo, que mira tu que tranquilu taba yo n’España enantes d’empezar a escribir y, agora, ya me toi entrugando por qué coño nun faigo la maleta y cuelo camín de… qué sé yo… d’Andorra, que ye una Cataluña en pequeño y ensin tonteríes.