Barrocu

infanta barroca

Escuca’l Barrocu na semeya que publica El País en primera hoi 9 de febrero. La infanta declarante mira pel cantu’l güeyu y sonríe. Son munchos años d’esperiencia y sabe facelo. La sonrisa ye dulce, serena. Favorécenla les formes redondines de la cara y, por qué nun lo decir, esa narizuca chata, achaplada, de payasín: sabemos que si los güeyos escapen pal cantu ye porque busquen, profesionalmente, el contactu col marabayu de cámares y flases, pero tamién podíen prevenir una tarta de merengue aventada a traición. Al par d’ella, l’axente de la Policía Nacional ye mármole ensin vida, ensin güeyos, ensin espresión, ensin humanidá. Soi yanomami que nun ta al tanto de l’actualidá española y, será pol contraste, simpatizo cola infanta. Poco más nos diba ofrecer la semeya si nun fuere pol tercer personaxe, que se coló a traición nel cuadru pa da-y grandeza y sentíu: la muyer que fisga detrás de la rexa de la ventana. Una pantasma, pintada nesos colores que son pura escuridá, tan de la paleta de Caravaggio. Media cara, simétricamente desvelada, y, al otru llau de la barra vertical que la vela a medies, un pechu que, ¡ai!, nun ta desnudu. La teta al aire diba ser metáfora preciosa de la sinceridá escondida. Bernini en Palma, el palcu de los Cornaro con vistes a la calle: dende la sombra mira la mentira que se representa al sol. «Sueña el rey que es rey» y la infanta que ye infanta, sueña’l xuez que xuzga y el republicanu na república. Pero la Verdá, prisionera detrás de los barrotes, sonríe, sarcástica. La infanta vence, inapreciablemente, la cabeza; la Verdá escurecida llevántala otro tanto, sube’l cazu y la ceya, trunfante. Disfruta cola representación, col gran teatru del mundu, y col xestu altaneru emite la so sentencia de falsedá convicta. La sonrisa de la infanta ye de llabiu apretáu, apresa palabres; la de la Verdá presa ábrese con disposición a contar. Son dos sonrises distintes y, por esta vez, la de la infanta hasta paez inocente.

infanta barroca

Anuncios