L’ultimu

La Nueva España, 2022/02/12

Estos díes d’iviernu, como fadrá tanta otra xente, aprovecho’l pigazu estacional del verde pa llimpiar los praos que me tocaron de la familia, iguar portielles y enderezar barganales. Córto-y les cañes más ruines y returniaes a dalgún fresnu espurríu, desanicio artos, cambio bárganos tumbaos, póngo-yos varales de castañar… Ayer trabayé nun prau que tengo nel valle del ríu Raigusu, o Reigusu, que la indefinición vocálica nel diptongu tovía nun la esclarié, y eso que voi ya pa vieyu. Más que valle, ye una vallina con vegues escases, encoyíes, a la sombra de la cara norte de la Peña Mea, onde amanez tarde y escurez lluego. Ye’l centru del mundu, espero qu’usté m’entienda. Pego martillazos pa espetar les puntes nos maeros y resuenen ecos nos castañeos que m’encierren. Pasa un cuervu y saludámonos. El Reigusu, al llau, anecia cola so monodia milenaria, ininterrumpida, que tamién sintieron xeneraciones y xeneraciones que me precedieron nesta tierra y nestos llabores.

—¿Seré l’últimu? —diome por pensar.

Al prau punxéron-y de nome Llinares, pero cuantísimaya que nun viste a naide. Al pie d’él, el ríu pega un saltu de más d’un metru y l’agua retumba na angostura del valle . El sitiu llámase Taraña. La etimoloxía ye bien cenciella: taran, nel gaélicu que se debió sentir dos milenios atrás per estos caminos, significaba truenu, y Taranis ye’l dios que lu gobierna. Húbolos, entós, que diciendo Taraña decíen Truenu, o’l llugar onde vive’l dios del truenu, onde retumba’l truenu. Yo, siempre que piso esti prau, preséntome, respetuosu, a Taranis, y pído-y permisu pa estorba-y el descansu. Quiero pensar que ya nos tenemos un poco confianza, ye una vida entera de visites. Notru tiempu remotu, cuando la goma de borrar del latín, esti latín nel que yo escribo, ya diba pasando, testerona y aplicada, pela memoria de la xente del valle, tuvo qu’haber ún, l’últimu, que, de pasu xunto’l saltu d’agua del Reigusu, pronunciaba Taraña y sabía, con un conocimientu ensin estudiu, que proclamaba un dios. Tuvo qu’haber ún, va 1.800 o 1.700 años, que fue l’últimu n’escaecer al dios que vivía na palabra, que se negó a escaecelu.

Nun sé si alguién vendrá, d’equí a cuatro o cinco décades, a iguar esti barganal que yo enderezo. Pue ser que lu coma’l monte pa siempre, y con él al prau Llinares, y el cuervu inmortal ya nun-y va glayar a ningún home que lluche, neciu, por conservar el mundu como lu conoció de rapacín. O pue ser que sí venga otru y diga poste, pero non bárganu; portilla, pero non portiella; zarzas, pero non artos. Nun ta en mio mano evitar lo primero. Contra lo segundo, fadré tolo que pueda por nun ser l’últimu.

Les cuentes de Sonseñor

La Nueva España, 2022/02/07

Sonseñor Jesús Sanz Montes escribió una carta, hai que pensar que pastoral, qu’esti diariu reproduxo’l pasáu vienres día 4. La razón última de la epístola ye doble: facenos presente a usté o a mi que somos responsables si un clérigu-y mete mano a un guaje y encender al so rebañu, un poco más, pola persecución que’l cristianismu sufre a manes del rojeríu imperante n’España. Vamos estudiala con atención:

Nun nos tenemos qu’engañar col primer párrafu: nun ye’l parte del tiempu, por munchos meteoros que cite (“vientos, lluvias y huracanes”, “cuatro gotas”, “una imprevista brisa”, “nieblas persistentes”). Tanta metáfora climática, que supón ún que l’obispu alcontrará literariamente brillante, ye una manera d’insinuar conspiraciones dañines que “señalan cabezas de turco”, qu’hai que suponer que son les del altu cleru, cosa chocante: debe ser lo que s’entiende por diálogu interrelixosu. Pero, ¿a quién querrán esimir de resposabilidaes los malos mediante elles, sabiendo qu’esa ye la función d’una cabeza de turcu? Nun sé: los misterios del obispu son inescrutrables. Entendémos-y, namás, qu’hai muncha maldá y qu’él sabe bien qué y a quién procura, pero nun nos lo revela. A ún, esti párrafu inicial trai-y a la cabeza aquello de Gila: “¡Alguien ha matado a alguien… y no me gusta señalar!”

Segundu párrafu. Los agresores son “algunos mandamases y sus terminales mediáticos”. Mandamás ye’l qu’abusa de l’autoridá que tien. Nunca lo dirá abiertamente, pa obliganos a los demás a facelo por él, pero a ún nun-y da más asumir esa carga: fala del Gobiernu d’España y de dellos medios de comunicación que seríen la so correa de tresmisión. Aquel y estos acusen a la Ilesia de lladrona y de pervertida, diz. Pero, ¿la Ilesia nun ye la paisanina que va los sábados a misa d’ocho, el rapacín que comulga de marineru, la pareya a la que-y llueve arroz a la puerta la parroquia o’l vieyu que recibe la extremaunción? Ningún gobiernu nin ningún periódicu los acusa a ellos de les desvergüences apuntaes anantes pol obispu. Convién nun socializar ataques nin culpes, en particular si tampoco se socialicen prebendes.

Tercer párrafu. La pedofilia ta mal, sí, pero nun ye cosa de la Ilesia: ye un mal de la sociedá. Pa nun ser socialista, l’obispu nun se cansa de socializar. Claro que’l cleru nun tien la esclusiva en materia de pederastia, pero alarma en particular, polo mesmo qu’un bomberu pirómanu o un policía narcotraficante. Nun puede estrañar que la xente s’escandalice, especialmente, col pedófilu que fexo, de predicar la virtú, presunta vocación y manifiestu mediu de vida. Y ye falsedá desvergonzada la del obispu cuando diz que la pedofilia ye un pecáu “de toda la sociedad”. Nomenon. El delitu (porque’l pecáu nun ye de lo que se trata) comételu, esclusivamente, el qu’abusa de la so posición de poder sobre un menor pa emporcalu coles sos babes reprimíes. Asegura Sanz Montes que la pedofilia ye “una lacra terrible de nuestra sociedad contemporánea” y responsabiliza de la so esistencia a “la educación ideologizada por el género” y a la facilidá cola que s’acede a la pornografía. Escaez que la mayor parte de les persones que denuncien abusos sufríos en centros escolares de la Ilesia son de la edá d’él y, cuando l’hermanu Tal-yos metió mano o los violó, nun esistía Internet nin se trataba de feminismu o de xéneru nes escueles: yeren otros tiempos. Esa esplicación, o esa disculpa, sonseñor, ye un anacronismu flagrante: nun cuela. Y acabamos coles matemátiques episcopales. Asegura Sanz Montes que dispón d’estudios estadísticos independientes (pero nun cita la fonte) según los cuales los abusos pedófilos cometíos por clérigos suponen, namás, el 0,2 % del total de los que se cometen. Y remató la carta: “Por eso sorprende el interés de un parlamento que se centra en este porcentaje e ignora el 99,2 % restante.” A media tarde del vienres, el periódicu cambió la cifra a 99,8 % na edición dixital. Alguién-y fexo la resta a sonseñor.

Estabulaciones

La Nueva España, 2022/01/19

1. De neños.

Vamos inventar una noticia. Nes vacaciones de Navidá, fundió’l teyáu d’una escuela pública (C. P. El Disgustu, por pone-y nome). Nel acidente, muerren obreros qu’iguaben fisgues en techu. Les autoridaes clausuren la escuela preventivamente y paez que la cosa va durar tolo que queda de cursu. Al día siguiente de la desgracia, téngalo usté por seguro, empiecen a pedi-y responsabilidaes a la direción del centru. La conseyería la primera, pero tamién los padres de los alumnos: uno, por tener los neños estabulaos en casa en vez d’en clase y, dos, espantaos de pensar que l’esbarrumbu pudo producise con ellos embaxo. L’equipu directivu del C. P. El Disgustu ponse a consumir ansiolíticos de manera incontrolada. Les inevitables xuntes que pueda tener cola AMPA son cualquier cosa menos amistoses. Hai voces, recriminaciones y amenaces de denuncia. Espléndidos, los propietarios d’una rede local d’escueles privaes y concertaes ofrecen espacios nos sos colexos pa que los escolinos puedan volver a clase… siempre mediando arrendamientu, claro. ¿Nun ye obligación de l’administración pública asumir costes consecuentes de les sos deficiencies? La opinión pública valora y aplaude l’ofrecimientu.

Volvemos a la realidá. El techu d’un colexu concertáu de Xixón fundió en vacaciones de Navidá y morrieron dos obreros. De momentu, ún nun vio, nos papeles, declaración ninguna de los padres de los alumnos pidiéndo-y responsabilidaes a la direción pol riesgu que pudieron correr los rapacinos (¡qué envidia nos dan eses AMPAs tan comprensibles a los profes de la pública!). La conseyería d’Educación ofreció espacios na Laboral, mediando arrendamientu, y, en vez de recibir aplausos, l’ofrecimientu merez les crítiques del PP de Xixón, que lu califica de sectariu y pide, ensin ésitu, na Xunta de Portavoces municipal, un compromisu de l’administración pública p’asumir, tocante a la escolarización de los afectaos, les consecuencies del sucesu, faciendo de menos que la empresa involucrada ya recibe una partida perres col conciertu educativu. Nun ye datu insignificante que les dos conceyales del PP estudiaren en centros de la Ilesia mientres los del equipu de Gobiernu poblaben, mayoritariamente, escueles públiques. ¡Qué engañosamente inofensivos paecen los pupitres! Según delantre de cuál te sientes de neñu, paez que te penetra en cuerpu un espíritu partidista, una especie de solitaria dogmática que se t’engarrancha, pa siempre, a lo más escuro de les tripes.

2. De ganáu.

Aprovechando la ola de polémiques prevocada poles declaraciones (pa ún más que razonables) del ministru de Consumu, la portavox del ayuntamientu d’Uviéu, Cristina Coto, pide un apoyu esplícitu del plenu municipal a “las macrogranjas” cola disculpa d’una presunta defensa de los ganaderos, presentaos, llaínamente, como un colectivu homoxeneu. Pero nun hai tal. Eses “macrogranjas”, campos de concentración d’animales en realidá, poco o nada tienen que ver cola casería qu’echa les vaques al monte o al prau, nin los empresarios que se beneficien d’elles dende los sos despachos con Internet de banda ancha saben lo que ye una guiyá nin cuántos tetos tien una gocha. Va poco, vimos, peles redes sociales, el vídeo d’un rapacín de Siero desembalando d’ente cartones, con una emoción irreprimible, la xatina que-y trexeron los Reis Magos. Na carta que-yos echó, pedía-yos, con mayúscules infantiles, “UNA XATI NA PINTA NEGRA QUE SEA DE VERDAD GUAPINA YCARIÑOSA SINO LA PODEIS TRAER NO TRAER NADA. MUCHOS BESOS MARIO.” ¡Nun sabe la xatina qué suerte tuvo de que Melchor, Gaspar y Baltesar la posaren, máxicamente, en casa Mario, y non nuna d’eses fábriques de carne pa les que Cristina Coto pide l’apoyu de los conceyales carbayones!

Un miagar pesáu

La Nueva España, 2022/01/08

Ún (pero, ¿qué sabrá ún?) nun tien claro que-yos convenga, a los empresarios de la restauración, que cumplen la dignísima función d’alimentar la sociedá, participar de la mesma sigla (Otea, nel casu d’Asturies) que los que sirven copes a les nueches, que, como poco, podemos decir que nun son sector estratéxicu. Si vio usté, na prensa on-line, les más recientes actuaciones y quexes del ramu de la fiesta y consultó les opiniones aneses de los lectores, comprobaría la escepcional unanimidá xenerada: la xente cansó ya d’esi miagar constante y pesáu. El Bacardí con Coca-Cola (toi desfasáu, asúmolo) nunca fue nin ye, por suerte, el pilar qu’aguanta pola economía asturiana. Y más fiesta n’interiores equival a más hores de trabayu pa los sanitarios: esta igualdá ya nun se discute. Usté dirá qué valora más: el descansu de los de la bata verde o los ingresos de los bares de copes.

L’últimu día de 2021, esti diariu publicaba una entrevista a un hosteleru xixonés que llamentaba’l cierre d’eso que llamen, inapropiadamente, “ociu nocturnu” (¿cuántes maneres nun habrá de gastar ociosamente la nueche ensin una barra delantre?). L’home enredábase nun marabayu de razonamientos deportivo-científico-políticos difícil de desenguedeyar. Preguntáben-y si se pegaba’l covid na hostelería y argumentaba que tamién nes escueles. ¿Quién-y esplica a esti peisanu qu’una escuela y un bar cumplen funciones de mui distintos interés y rendimientu pa la sociedá?

Na seción d’Uviéu, veíemos una semeya de la cola entamada por un grupu hosteleru carbayón, alredor de la Xunta Xeneral, pa devolver l’importe d’entraes vendíes pa fiestes de fin d’añu. Más de mil adolescentes, de vacaciones escolares, esperaron, mansos, pa recuperar unes perres que-yos teníen que tornar, piensa ún, nos mesmos locales onde les pagaron o polos mesmos procedimientos, si fueron telemáticos. Los hosteleros (¡qué poco me gusta aplicar esta palabra de manera xenérica!) abusaron indignamente, tal como lo entiende ún, de la folganza vacacional y del gregarismu de los chavales pa manipulalos y convertilos en tropa inconsciente al so serviciu frente a la clase política, que tan enfadaos los tien. Prohibíes les fiestes de fin d’añu, si sigue medrando l’andancia, “¿a quién van a echar la culpa ahora?”, entrugábase ún de los empresarios.

—¿Y a ti qué más te da? ¿O queríesla entera pa ti? ¿Cuántes perres compensen por esa culpa?

Y escandalizábase, el mesmu entamador, cola posibilidá de que los sancionaren por armar aquel xaréu na calle: “Era lo que nos quedaba, que nos multaran.”

—Pues claro que sí. ¿Puede un empresariu usar la vía pública como oficina privada? Nel rexistru de la Seguridá Social, ¿figurará como sede del negociu la cera de los impares de la calle Fruela d’Uviéu?

En fin: ún nun se quier entrugar, tampoco, poles razones últimes del drama. A una sociedá que, cada siete díes, si nun ye más a menudo, sal de casa a correla, dícen-y que la última d’esti añu nun va poder ser y, polo visto, acábase’l mundu. Algo hai ehí de yonquis. Pero nun va ser ún el que tire la primer piedra, que sabe lo que se sufre ensin esi cachinín de chocolate negro pa rematar la comida.

¡Ánimu, que 2022 va venir meyor!

De los males, el menor

La Nueva España, 2021/12/28

Pues sí: dalgo de verdá hai neso de que la vida repítese, y repítese, y acaba poniéndonos nel sitiu de los nuestros mayores…

Cuando ún yera profe novatu, allá pelos años ochenta y tantos del sieglu pasáu, coincidió, nun institutu carbayón, con un veteranu señardosu del “Régimen”. Hai… o había daquella un ciertu modelu de carca escépticu, fatalista, ocurrente y, por qué non, simpáticu. Esti al que faigo referencia comentaba’l felipismu imperante poco, porque se sabía en territoriu enemigu na sala de profesores, pero, cuando lo facía, tiraba de sorna. En cierta manera, fue un profeta del desengañu. Y llegó aquella güelga histórica de la enseñanza, la del añu 88, cuando los docentes tuviemos alredor d’un mes ensin entrar nes aules reclamándo-y más sueldu al ministru d’Educación, José María Maravall. Esti carca del que toi falando esprecetábase, atrapáu nun dilema irresoluble:

—Y yo, ¿qué hago ahora? Si me pongo en huelga, estoy siguiendo la consigna de los sindicatos rojos. Y, si no me pongo, voy con el Gobierno socialista. ¿Qué coño hago yo ahora?

Tres décades y media depués, otru Gobiernu socialista mándanos a los ciudadanos que volvamos a tapar el focicu p’andar pela calle y, a esti que firma, tal mandatu, más que discutíu por xente que paez qu’algo sabe del asuntu del virus, abúlta-y una fatada, una sobreactuación impuesta pol mieu a la galería, al deu ciudadán y colectivu que te puede señalar como gobernante apáticu, descuidáu, en contraste con tal otru de Francia, Italia o Portugal que prohíbe y dicta más y meyor. Y lo que la cabeza-y pide a ún ye la rebeldía, salir a pasear a cara descubierta. Pero mires los medios de comunicación y alcuéntreste colos abanderaos rojigualdos y monosilábicos que dicen otro tanto de lo que tu pienses, que se declaren insurrectos en materia de fociquera y nun la piensen poner. Y ún vese, xusto, nel mesmu dilema d’aquel vieyu colega y cola mesma veteranía qu’él tenía d’aquella.

—Y yo, ¿qué faigo agora? Si pongo la fociquera, toi siguiendo la consigna d’un Gobiernu histriónicu. Y, si nun la pongo, voi cola carcundia populacherista. ¿Qué coime faigo yo agora?

Al final, aquel vieyu carca fue a la güelga, porque, puestes les dos coses na balanza, estropiába-y más el fégadu que naide lu fuere a confundir con un socialista. Y esti vieyu progre, por un prexuiciu similar por más qu’ideolóxicamente opuestu, va salir a la calle col focicu tapáu. De los males, el menor.

Cuentu de Navidá

La Nueva España, 20/12/2021

Na calle Corrida de Xixón tien puestu estable de mendicidá una vieya. Lleva un moñu blancu empericotáu que contrasta cola indumentaria rigurosamente prieta: ye una muyer en blanco y negro. De pies, el llombu contra una fachada, aguanta un vasu de café de plásticu y repite, con monótona regularidá de metrónomu, la mesma salmodia: «¡Una ayudina, por favooor…! ¡Una ayudina, por favooor…!» Hores enteres puede gastar aneciando na súplica y difícilmente-y diba poner tacha a la so precisión rutinaria’l cronometrador más repunante.

A ún, cada vez que la ve y la siente, vien-y a la cabeza aquella composición de Gavin Bryars, que ya tien unos añinos, Jesus’ Blood Never Failed Me Yet, fecha sobre la grabación d’otru probe de pedir, un vagabundu que, con voz cascada, cantaba peles calles londinenses, allá pela década de los 70 del sieglu pasáu, y que decía enfotase na sangre y nel amor de Cristo. Bryars fexo un bucle con esos pocos segundos de mendicidá y repite’l cantarín cerca de media hora metiéndo-y, sele seliquino, fondu de cuerdes. El resultáu ye conmovedor. Y a ún ocurrióse-y qu’esta peisanina de la calle Corrida de Xixón nun atesora, na so tonada, menos emoción que’l colega británicu, y qu’había que la grabar, porque, ¿por qué nun va dar ella, tamién, pa una pieza de méritu? Ye verdá que’l proyectu peca de poca orixinalidá, mediu sieglu depués de la obra de don Gavino l’inglés, pero la xente anda permal neso de la música culta, peor tovía si ye cosa de modernos, vanguardistes y minimalismos, asina que pocos diben tar al tantu del referente.

—¡Voi grabala y manda-y el clip a Ramón Prada! —decidí.

Y ehí me tien usté, rondando pela calle Corrida como depredador, un día sí y al otru tamién, esperando l’advenimientu de la presa sonora. Pero, la que yera vecera de diariu, volviose escapadiza: nun asomaba. Convirtiose n’emperador sonoru de la calle’l negru de los paragües («¡Paraguas…! ¡Paraguas, que llueve…! ¡Cómprame un paraguas…!»). Tará usté comigo en que nun hai color. Y vagó, vagó, pero, por fin, volvió la muyeruca a la paré de la so fachada, vasu de plásticu per delantre:

—¡Una ayudina, por favooor…!

Como la fuina, fui arimándome a ella. Saqué’l móvil. Punxi la grabadora.

—¡Una ayudina, por favooor…!

Pasaben viandantes, había ruíu ambiente y mieu me daba de que m’estropiare la grabación. Tenía que m’averar más a la peisana.

—¡Una ayudina, por favooor…!

A un pasu d’ella, fixi como que miraba un escaparate. Comprobé que la grabadora avanzaba. Convenía tar quietu y rexistrar, polo menos, dos minutos pa tener fiel testimoniu de la regularidá del cánticu. Subí la vista del teléfonu y vi, a un palmu les narices, unes ñalgues de valquiria. L’escaparate yera’l d’una franquicia de lencería qu’esibe, de reclamu, una pantallona vertical que reproduz, tamién en bucle (como una especie d’anticristu imaxináu exprofeso pa la pieza de Bryars), un clip con moces reblincando, felices como cabritines, en ropa interior. Podía decise que yo, varón de más que mediana edá, fozaba naquel muestrariu multirracial y multicolor de culos y bragues. La xente pasaba al mio llombu. Imploré-yos a tolos dioses pa que nun me viere ningún conocíu… peror tovía: ninguna conocida, ningún alumnu, l’inspector del instititu… Nun se fai usté idea de lo inacabables que resulten dos minutos nesi trance. Pero nun me podía mover: tenía un compromisu col arte. Taba atrapando l’alma d’una vieya enlutada delantre d’un despipote de cuerpos femeninos en flor.

Calmosos a costa fecha, los dos minutos pasaron y pudi guardar el teléfonu, azotáu por escapar del sitiu del pecáu, doble si se quier: contra’l sestu y contra’l sétimu. En teléfonu, llevaba robada, ya digo, l’ánima de la vieya. A ún quéda-y un plizcu de conciencia: saqué la cartera y eché-y dos euros en vasu a la mendiga. Y fuxí encoyíu. Y, a los tres pasos, invadiome la epifanía con esa voz ayena, independiente, que gasten les revelaciones: «Ya sabemos en cuánto valores les almes, tasador miserable.»

[Y esta ye l’alma robada.]

Pase usté unes bones pascues.

Laicidá y liberalismu

La Nueva España, 2021/12/12

Laicidá.

Va unos años, ún escribía, nesti mesmu diariu, una seción denominada Casting que facía por promocionar, al estrellatu cinematográficu, a personaxes notables del momento astur, los más d’ellos políticos (¿qué quier usté?, ye pa lo que da l’actualidá). A tal conseyeru metíalu nuna película de vaqueros; a esta parlamentaria, nun drama románticu; a aquel secretariu d’Organización, nuna de terror… El papel dáben-yoslu la planta, el xestu, les maneres. Determinada entrega protagonizola ún de los que fueron conceyales de Cultura cuando’l Gabinatu. Llíbrenme los dioses d’acusalu de ninguna maldá pero ello ye que siempre-y vi al home un aire dolicocéfalu, xermánicu, de cazu altu. El negro tieso Hugo Boss de los uniformes de la Schutzstaffel nun-y podía sentar peor qu’a Maximilian Schell. Di-y papel, entós, nuna d’aquelles columnes, de mandamás nazi con ventana a la avenue Kléber, París a los pies, y púnxi-y, en guión, un par de frases xenocides de canalla refináu. En mala hora. Nun-y vagó a la familia Oceransky, en portavocía de la Comunidá Israelita d’Asturies, mandar cartes enceses al periódicu acusándome poco menos que d’antisemita. Esti probe ignorante facíase cruces (por favor: nun se me malinterprete esta frase tamién como prevocación, ¡namás me faltaba eso!) porque’l nazi que representaba aquel conceyal propuestu pal noble arte de Melpómene yera, evidentemente, el malu del cuentu. ¿Cómo podía pecar yo, entós, d’antisemitismu? Como ún se crio, literariamente, al pechu de Rojas, Proust, Kafka, Canetti, Singer, Broch, Morgenstern, Bellow, Eisner, Kertész, Roth, Asimov (sí, Asimov tamién, ¿qué pasa?) y etc., etc., cuésta-y concebir un xudíu que nun entienda lo que lle, anque tea en bable. Por eso, la virulencia del corréu públicu Oceransky goliome a chamusquina.  Daquella (2008), un técnicu municipal encargáu de la promoción sefardí esplicába-y a la prensa qu’Uviéu yera «la ciudad que más colabora con la comunidad israelita». Ún gusmió qu’esa colaboración igual tenía que ver cola sobreactuada (ya que non iletrada) amás d’innecesaria defensa del conceyal qu’entamaben Aida Oceransky y los d’ella, y cortexome la tentación de xorrascar nos archivos municipales pa salir de duldes. Pero, víctima de la folganzanería que nada entama o de la hiperactividá que nada consuma, quésiyo, dexelo pa prau. 

Too esto, sufríu lector, nun ye más que prolegómenu pa decir qu’asumo, con resignación pagana, que me vuelvan a acusar d’antisemita por decir lo siguiente: nun me prestó gota la presencia de representantes públicos na apertura de la Janucá nel Fontán, el pasáu día 4, na que, otra vez, tuvo un papel destacáu la señora Oceransky. «Esta conmemoración contó con el apoyo del Gobierno del Principado de Asturias, representado por la viceconsejera de Justicia, Encarnación Vicente, y por el Ayuntamiento de la ciudad, con la participación del vicealcalde Mario Arias», lleímos en La Nueva España. La Janucá nun ye actu civil n’homenaxe a les víctimes del Holocaustu. Hai apelaciones a la divinidá, bendiciones rituales y rezos: ye fiesta relixosa sometida a una liturxa más que milenaria. A los 8 de setiembre, ún suel escribir, nestes páxines, pidiendo-y al Gobiernu (inútilmente) distancia coles celebraciones católiques de Cuadonga. Pues esto, igual. Separtar fe y Estáu ye un requisitu de laicidá, pa cualquier democracia moderna, que nun reza namás tocante a la cruz: tamién val pa la estrella de David o pa la lluna creciente. 

Liberalismu (lingüísticu).

Consiéntame parafrasiar, con respetu repunante a la construción de la frase y al pensamientu inherente a ella, les recientes declaraciones de Pablo Casado sobre’l casu d’esi neñu catalán que tien problemes lingüísticos cola escolarización (declaraciones que cualquier persona de talante «liberal» compartirá plenamente): «¿Cómo es posible que a un niño no le dejen ser educado en asturiano dentro de Asturias?».

Propósito d’enmienda

La Nueva España, 2021/12/6

Ún ta gramaticalmente escarmentáu y nun quier tracamundiar, na palabra «xusticia», el sustantivu común abstractu y el propiu que singulariza ún de los poderes del Estáu. Na sentencia dictada contra los seis que fueron cúpula del sindicatu UGT Asturias, podrá identificase solo una de les dos xusticies, o les dos de la mano, según amores y odios. Esti ignorante que firma nun los tien al respectu y, amás, desconoz el miollu del Derechu qu’encontia la resolución. Siempre-y abultó, de toles maneres, que les penes de prisión teníen que se limitar a los que, sueltos pela calle al llau d’usté o del míu, pueden suponer un peligru, y nun abulta’l casu d’estos seis, como de tantos otros delincuentes de guante blancu. 

Más seguridá siente ún tocante a los comentarios que la noticia causó. Interrogáu al respectu, el principal protagonista d’esti drama xudicial, Justo Rodríguez Braga, que fuere secretariu xeneral de l’asociación, nun se declaró porque «es un tema del sindicato» Como estratexa, ye ridículu esi desentendimientu, esi «la cosa nun va comigo». ¿Cómo nun va dir con él si ye a él, personalmente, al que-y espeten dos años llargos de cárcel y casi 600.000 euros de multa? ¿La xueza manda, pal cuartón, una bandera colorada con dos manes enllazaes en mediu d’ún círculu blancu o mándalu a él? ¿Será la cárcel un cuartu de banderes?

Fernández Lanero, sucesor de Rodríguez Braga al frente de la UGT, agárrase a la táctica del ventilador: diz que los que soltaben les perres, directores xenerales del Serviciu Públicu d’Empléu del Gobiernu asturianu d’aquellos años, son tan responsables o más del delitu, si lu hubo, porque dieron de pasu les operaciones agora declaraes irregulares. Pero la xueza discúlpalos con indignidá: fueron incompetentes. Esa denigración d’aquellos cargos nun paez que vaya contentar al sindicatu, qu’anuncia recursu. 

Entiende ún que Fernández Lanero nun tien por qué facer, a títulu personal, actu de contrición, nin él nin tampoco UGT Asturias, porque, si me lo permite usté, UGT Asturias nun esiste. Como nun esisten Comisiones Obreres, nin el PSOE, el PP, La Fundación Princesa de Asturias, la Hermandad de los Estudiantes d’Uviéu o l’Asociación de Vecinos de La Fresneda, qué sé yo… Esisten persones que, transitoriamente, guárdense embaxo la capa d’unes sigles o d’un nome propiu colectivu a efectos nobles o indignos, según. Por eso, repito, l’actu de contrición nun-y toca a Fernández Lanero, como tampoco’l dolor de los pecaos, y demandá-ylo a UGT Asturias ye demandá-ylo a una fantasma verbal. Pero’l propósitu d’enmienda, o dalgo pol estilu, nun ta de más nesti asuntu. Esta sentencia, como’l casu Villa anantes, desacrediten, gravemente, el sindicalismu (ente otres coses porque la xente, enquivocao, sí cre qu’esisten los sindicatos, ¡vaya por Dios!). Felices, el (dizse) protopopular coordinador de Ciudadanos, Nacho Cuesta, y el portavox del monosílabu nefandu resfreguen les manes señalándo-yos, a los medios de comunicación y a la sociedá, la corrupción y la rapacidá de los representantes de los obreros y, en consecuencia, de forma tácita, animando al desentidimientu del asociacionismu de clase. Y ye lo que tienen que facer: son derecha. Si-yos lo ponen a güevu (perdóneme usté la espresión), más fatos diben ser de nun lo aprovechar. Y son estos seis condenaos de la sentencia reciente, y otros cabezaleros sindicales qu’a usté-y vendrán a la memoria ensin esfuerzu, los camareros que-yos sirven la bandexa de plata. En solidariu beneficiu de los que los sucedan y, por qué non, d’unos innegables intereses de clase, Fernández Lanero y los que, como él, ostenten agora sigles sindicales acertaben más, pamidea, dándo-yos el finiquito y, si te vi, nun m’acuerdo.

(Bueno… ¡El finiquito! ¡Qué bobada!)

Pretty Woman y los callos envasaos

La Nueva España, 2021/12/01

Andrés Illescas, corresponsal sierense d’esti diariu, secuestrome l’atención, el pasáu día 26, titulando un despiece d’esta manera magnífica, rotunda: «Ciudadanos pide libertad para prostituirse y enfada a Somos.» Según contaba, la portavoz municipal de Ciudadanos, liberal lato sensu, entiende que poner medíes legales p’acabar cola prostitución nun ye tanto abolir como prohibir, y que les persones tienen derechu a usar el cuerpu como bien de mercáu, si-yos da la gana, ensin que l’Estáu meta’l focicu. Una conceyala de Somos Siero contestó-y que les coses nun son tan cencielles y que, cuando-yos preguntes a les neñes qué quieren ser de mayores, ninguna contesta: «Puta.»

Nin tiries nin troyanes, piensa ún. La edil naranxa paez entender la prostitución a la lluz falso y empalagoso de Pretty Woman: un negociu onde una fulana independiente, simpatiquísima y guapísima engancha con un millonariu educadísimu y guapísimu, y hasta queda sitiu, ente los dos, pa Cupido. Poco d’eso debe haber nes tristeces que proclama’l neón al borde les carreteres, ya se sabe. Pero, del llau de la morada, tampoco impera la finura. Lo primero, porque ún nun pon la mano en fueu pola afirmación de la conceyala: la infancia ya nun ye lo que yera. Y, d’otra manera, porque hai munches otres profesiones que nun gocen d’apreciu na fantasía de les rapacines. ¿Cuála espera, con ilusión, facese mayor pa poder fregar portales o envasar callos en conserva?

En fin, l’asuntu ta mui percima de les posibilidaes intelectuales y de les capacidaes morales d’esti probe plumíferu, y por eso quiero más refuxame na seguranza de la gramática y los sos placeres. «Ciudadanos pide libertad para prostituirse.» ¡Nun me diga que nun-y ve’l mensaxe liberal por partida doble!

El RIDEA y la defensa de La Bastilla

La Nueva España, 2021/11/22

A ún ya-y aprobez que se resuelva lo de la cooficialidá de la llingua pa bien o pa mal (según el que lo mire) pa dedicar esta columna a les coses que de verdá-y presten: l’apocalipsis según Sanz Montes, la rebelión del animal montés o la mendicidá creativa. Mientres…¡Qué pena nun tar ente los asistentes a la conferencia que s’impartió nel RIDEA’l pasáu miércoles 17 sobre l’Estatutu d’Autonomía! Según contó esti diariu, aquello acabó nuna protesta unánime (nun s’espera menos que la unanimidá nos organismos que se constituyen por cooptación) contra la reforma que se ve venir. Ponentes y públicu concluyeron que nun-yos gusta eso de la cooficialidá porque «hay cosas poderosamente  más urgentes» (y eso val d’equí al fin del mundu), «no llegan ni al 0,1 por ciento quienen solicitan hacerlo» (usar oficialmente la llingua autóctona: el 0,1 % de los asturianos son mil y diez veces esa cantidá manifestose, nun va nada, peles calles d’Uviéu reclamando la oficialidá), o, según misteriosu razonamientu de Teresa Mallada, presente nel actu, porque «todos estamos orgullosos» del bable y por eso nun procede que sea oficial (dexando pa prau el cucurrabucu mental de la presidenta del PP casturianu, ún nun entiende cómo se puede tar orgullosu d’un idioma que nun tien nada que lu faiga especial nin distintu de los demás: esta señora nun acaba d’entender de qué va la cosa). En fin: aquello paez que fue una especie de secuela de Los amigos de los bables, estintu grupu de superhéroes culturales, en bona medida vinculáu al RIDEA, que, allá a últimos de la pasada década de los 80, defendieron la sensatez y el pensamientu, tal como ellos los entendíen, riéndose de les pretensiones de los bablistes dende l’altura de la so autoridá intelectual, provincianamente indiscutida. Agora ya nun se ríen: esi ye’l gran cambiu. Agora, esprecétense, avisen, protesten. Un momentu magníficu de la sesión tuvo que ser cuando un vieyu cargu del felipismu clamó pidiendo lo que namás ta a tiru del Partíu Comunista Chinu: la unanimidá pa modificar l’estatutu. Esto de la democracia ye una putada cuando nun nos pasa la mano. ¡Qué pena nun tar sentáu nel salón d’actos del RIDEA, el día 17, observando, discretamente, el final del Ancien Régime! La desesperada petición del felipista chinófilu, qu’albidramos secundada por vigoroses sescudíes de cabeza de los demás asistentes, fai que s’acuerde ún d’aquellos Estaos Xenerales franceses de 1789. La reforma xurídica impulsada pol Tercer Estáu trunfó percima l’inmovilismu de los antiguos privilexaos, pa los que la sociedá yera perfecta como venía siendo, cada estamentu nel so sitiu: equí, na ciudá y na cultura, el profesional liberal y el profesor universitariu d’espresión castellana; ellí, nel bucolismu de la vaca y el cuchu, el peisanu bablante. Dira usté que ye una comparanza bien desproporcionada, y yo nun-y quito la razón, porque aquellos nobles y altos clérigos que defendíen los sos fueros teníen enfrenten un enemigu real qu’asaltaba la Bastilla y mataba titulaos; estos otros d’agora nun tienen a naide enfrente, naide nin nada que nun seyan los sos mieos.