Un premiu pal inquisidor

queso_mujer

«Queso de mujer» nun ganó’l premiu del Certamen Nacional de Arte de Luarca. Debe ser la primer vez que n’Asturies nun se premia un quesu. Les razones nun fueron gastronómiques y sí morales. Gastronómiques nun podíen ser porque, qué decepción, la obra limitábase al continente del productu y sisábanos el conteníu. Puestos a polemizar, tenía qu’haber quesu dientro la caxa de quesu. ¿Auténticu quesu de muyer? Un misteriu más revalorizador de la obra, como’l de la Merda d’artista (30 gramos escurríos) supuestamente enlatao (o non) y sellao por Piero Manzoni.

Ún nun sabe por qué los ayuntamientos, les diputaciones, les autonomíes y l’Estáu anecien en caltener tratu col arte. Nun da votos y siempre queda algún responsable col culu al aire, nel papelón d’inquisidor con autoría rexistrada na hemeroteca de faltosaes memorables. Verbi gratia, l’alcalde socialista de Valdés, Simón Guardado: «La libertad tiene que llegar hasta donde tiene que llegar.» La tautoloxía, digna de Popeye («¡Yo soi como soi!»), tien reminiscencies bíbliques. San Pablo a los gálatas, 5:13, edición Reina-Valera: «Porque vosotros, hermanos, a libertad habéis sido llamados; solamente que no uséis la libertad como ocasión a la carne…» y 5:19-21: «Y manifiestas son las obras de la carne, que son: adulterio, fornicación, inmundicia, disolución, idolatría, hechicerías, enemistades, pleitos, celos, iras, contiendas, disensiones, herejías, envidias, homicidios, borracheras, banqueteos, y cosas semejantes a éstas.» Como quesu de muyer.

La secretaria d’Igualdá d’IU nel ayuntamientu de Valdés, Aurora Valdés (mira tu qué redundancia) tamién anduvo brillante, la que más. Primero, súmase a la idea cristiana de les llendes de la llibertá: «Entiendo que en el arte, como en otros ámbitos de la vida, no todo vale.» Entiende lo mesmo que’l so probable pariente antepasáu, l’inquisidor xeneral Fernando Valdés Salas, autor del Índice de Libros Prohibidos a mediaos del XVI: el tiempu ye una ilusión. Depués métese nun xardín y piérdese nél: «No está muy claro lo que se pretende con ella y confunde […] Todas entendemos que la obra no ha conseguido lo que pretendía y que el jurado [que la seleccionó ente les obres finalistes] se equivocó.» Y digo yo: si nun ta claro lo que pretendía la obra, ¿cómo sabemos que nun lo consiguió? ¿Quién son «todas»? ¿Qué méritos profesionales, vinculaos al mundu del arte, aporten «todas» que les acrediten pa desautorizar tan radicalmente al xuráu?

Los nuevos clérigos (y clérigues) tán echaos al monte. Quieren ser d’un pelaxe distintu al otru qu’hubo enantes, de pelleyu de sotana, pero en realidá ye’l mesmu. Ya tienen hasta catecismu (la conceyalía de Cultura valdesana argumentaba contra’l quesu virtual qu’usaba «imágenes y textos que son contrarios a los principios consagrados en la normativa y recomendaciones vigentes respecto a la igualdad de género y la imagen de las mujeres.» Atención al participiu «consagrados», tan sacramental.) Los inquisidores son, por naturaleza, ignorantes y gregarios, y por eso peligrosos. Cuidáu: empiecen censurando arte y, si salen trunfantes, ya nun ven sebe. Ta creándose una policía del bien pensar en paralelo al organigrama del Estáu y nun descarte que lu acusen a usté, un día, de trancase en casa a corta-yos el pescuezu a gallos y gallines pel Yom Kipur, entiéndase, a contar chistes políticamente incorrectos coles persianes baxaes. Les instituciones, cobardes estatutariamente, sobrevaloren la so influencia social y ríndense-yos. Fináncien-yos los exercicios espirituales del momentu y pónen-yos mantel y platu a la mesa del poder. Lo que-yos falta d’intelixencia compénselo con perseverancia, virtú que nun ye despreciable. Un premiu anual al censor más neciu y ultramontanu podía reconocer esi esfuerzu: Premiu Inquisidor Valdés Salas concedíu por artistes y ciudadanos agraviaos. Propongo al ayuntamientu de Valdés, pero seguro que sobren candidatures.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: