¡Más banderes!

La Nueva España, 29/06/2015

Estos díes, na fachada de la casa conceyu d’Uviéu y d’otres villes, ximiélgase o pinga, según les circunstancies atmosfériques, una bandera nueva. Pa lo que sigue, lo de menos ye cuál. Tamos en 2015, y les banderes de moda: ¡qué coses hai que ver atreviéndose a apartar la vista del suelu! La progresía pide asta pa les propies o reclama derechos sobre les que’l común de los ciudadanos, con criteriu contrastáu que mecía usu, abusu y tradición, venía entendiendo como patrimoniu ayenu (véase l’espectacular abanderamientu rojigualdu del candidatu socialista a la presidencia del Gobiernu d’España). D’otra manera, el conservadurismu nun renuncia a les propies, en casa lo mesmo que nel anchu mundu: ehí tenemos la reciente polémica sobre la enseña confederada y la matanza de Charleston. En fin: más banderes que nunca.

Yo desconozo l’interior de les fábriques de banderes, pero paezme que deben ser lo menos esaltante del mundu. Lo mesmo que tres tonelaes de centollos meten más mieu que llamen a la gula, abúltame que rollos y rollos de metros de bandera estraguen l’espíritu patrióticu. Pero igual m’enquivoco, y el ciudadanu sensible a los símbolos, esi que se respiga viendo l’emblema campar, conquistador, contra’l gran océanu celeste, sobrespuestu a concentración tan intensa de la tela amada ye quien a sufrir una variante del síndrome de Stendhal y desmayase inerte ente les bobines.

Tres perfiles obtenemos d’enfrentar al ser humanu coles banderes: el vexilólogu, el vexilófilu y el vexilófobu.

En cada neñu qu’anda un paséu marítimu de la mano de güelito o güelita hai un vexilólogu en potencia. «¿Y esa?» «Francia.» «¿Y esa?» «Holanda.» «¡Si son iguales…!» «No, porque una ta tumbada y la otra…» Si tien usté nietos, párese a pensar na responsabilidá qu’asume cuando los lleva a la playa: el modelu adultu (por llamalu d’alguna manera) del guaje protovexilólogu ye’l doctor Sheldon Cooper, espectativa terrible. Valore’l silenciu como una opción interesante.

El vexilófilu ye, esencialmente, impúdicu, esibicionista y sectariu. Sabe de banderes por eliminación: «Toes – 1 (que ye la que yo pongo a la ventana) = Mierda.» Por suerte, en dellos casos, un barniz hipócrita (eso que llamamos educación) atempera la bestia fanática, pero hai otros tantos o más a monte. Con un vexilófilu montés tropecé va poco, la tarde del ascensu del Sporting a primera. Deambulábemos la perra y yo per Xixón. A mil kilómetros pal este, un árbitru pitó’l final del partíu del Girona xusto cuando pasábemos per delantre la puerta d’un bar. Derrumpió pa la calle un forofu desencaxáu (echémonos pa un llau pa evitar l’atropellu), incapaz d’articular palabra, tresformáu nuna especie de gorgona dramática, terrible, inhumana, que sescudía, percima la cabeza, en vez de culiebres, una bandera esportinguista apresada ente puños pelos que nun corría la sangre. Alredor d’un minutu, mientres estruyaba, frenéticu, el trapu victoriosu, profirió un repertoriu de soníos guturales primates (por valoralos alto) y, cuando por fin fue quien a verbalizar, berró: «¡Puta Oviedoooo!»

Vexilófobos somos los inadaptaos, polo normal cincuentón el más mozu, que pensábemos, allá atrás, na edá de la inocencia, que díbemos vivir un tiempu nuevu baxo l’imperiu de la razón. El desengañu llevó al escepticismu y, agora, hasta vestimos camises de Tommy colos colores del imperiu na etiqueta. Quitando esos pecaos veniales, los vexilófobos somos protestantes luteranos en materia de símbolos. Nun tengo lectures antropolóxiques, pero seguro qu’algún espertu se refirió al ser humanu como «animal simbólicu». Pues a los vexilófobos quítennos l’axetivu, que nos ofiende.

Anuncios

2 Responses to ¡Más banderes!

  1. xuan says:

    Simplemente quería felicitarte por tus elegantes palabras en “Sufrimientu” sobre el caso del oso de Porley. Me emocionaron.
    Nada más, muchas gracias.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: