La chacona

La Nueva España, 21/03/2015

Finalmente, paez que sí dormíen la nueche de los xustos, nel conventu de les Trinitaries de Madrid, los güesinos de Cervantes. El martes pasáu acreditólo l’equipu forense que llevaba l’estudiu.

Esi martes, tamién, la prensa notificó que la comisión parlamentaria qu’investigaba’l casu Villa nun fue quien a acordar conclusiones sobre la carroña que remanaba: nun fueron tan eficaces.

Que yo tenga presente, Cervantes acuérdase dos veces d’Asturies na so obra. La más popular, por mediu de la feísima y cayuela Maritornes. Tamién en La ilustre fregona echa mano del xentiliciu. Nun se m’ofenda si-y apunto l’argumentu, que ya sé que lu conoz: dos rapazos de bona cuna salen pel mundu a correr aventures baxo personalidá falsa. Ún d’ellos faise llamar Lope Asturiano. En Toledo, ármase folixa ente mozos de mules y fregones, y Lope Asturiano anímase a tocar la guitarra y cantar una chacona p’animar el baile.

Pela comisión Villa pasaron 67 persones. Casi ninguna quinxo bailar al son que-y tocaben. La voz cantante llevábala Ignacio Prendes, y paez que nun gustaba al públicu, nin siquiera a los otros músicos, una parte d’ellos afónicos, otros desafinaos, los más ensin instrumentu. La fiesta acabó en fracasu.

La chacona yera un baile indecente. Danzarín y danzarina, según describe don Miguel en El casamiento engañoso, tírense besos, chisguen güeyos, ximielguen los cadriles y resfréguense «entornando los ojos, y parece que, danzando, llegan al último éxtasis del amor». Como la perrea del reguetón d’estos tiempos, que paez que dan y reciben, ¡pero qué va!, pel mediu interponse una doble frontera infranqueable de minishort y pantalón.

¿Cómo ye que Villa recibió tanto? ¿Y quién-y dio? Estos yeren los misterios que la comisión parlamentaria se comprometió a desvelar, palabra vana: pel mediu había minishort, pantalón y doble manta zamorana. Ye la segunda vez que Prendes se mete en negocios col PSOE y el PP, y la cosa acaba como l’anterior: perrea, perrea.

Lope Asturiano canta mui animáu mientres los mozos de mules y les fregones blinquen, revoltosos: «Todos lo han hecho muy bien, / no tengo que les rectar; / santígüense y den al diablo / dos higas de su higueral.»

Toos y caún cumplieron razonablemente nel procesu políticu de Villa. Si algo salió mal, la responsabilidá ye güerfana nesti casu, como en tantos otros. Y, si fai falta un muñecu del pim pam pum, los pelotazos contra’l presidente de la comisión, qu’agora paez que ye’l culpable del delitu. Total, aunque nun-y pegue ninguna bola, va tumbar d’equí a dos meses. ¿Cuánto nun se reirán los otros comisionaos? ¿Qué comentarios llaínos y xugosos compartirán, ente burbuses, peles dependencies del parlamentu asturianu?

«Escupan al hideputa / por que nos deje holgar, / puesto que de la chacona / nunca se suele apartar», reíase’l descaráu Lope Asturiano, y hai que suponer que los danzantes asonsañaben les palabres con xestos.

Contaron los periodistes que, na última convocatoria de la comisión, de la que teníen que salir conclusiones que xustificaren los meses ocupaos nel asuntu, les voces de los miembros sentíense pelos pasillos de la Xunta, y sacaron en consecuencia desalcuentros y enfados. Pero yera una chacona:

«Que el baile de la chacona

encierra la vida bona.»

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: