El programa persa

La Nueva España, 28/02/2015

Protesten los estudiantes, disconformes cola nueva dieta que’l ministru-y prescribe a la formación universitaria, enferma d’anemia que dicen querer curar con purgues. ¿De qué se quexen, esclama’l coru de Wert, si van titular pagando tres cursos en vez de cuatro? Ye verdá: con tres años basta pa fotografiase na orla. Si l’oxetivu’tis esi, bárbaro. Si’tis cualificase, nun llega. La carrera saldrá más barata pero estudiar, más caro. La xugada del ministru, de toles maneres,’tis otra. Perdíos nesta discusión de la cuenta del cinco (que si 3 + 2, que si 4 + 1), ya naide reivindica’l 5 + 0 en vigor antiayer, como’l que diz.

Nun me paez qu’a los profesores interinos-yos vague muncho protestar tamién. Tienen el puestu de trabayu nel aire. Wert planea cambialos por becarios y, mal asuntu, la otra opción de gobiernu clásica, por boca de Pedro Sánchez, rescataba, el pasáu mes d’ochobre, la ocurrencia foína de Rubalcaba de poner a funcionar una especie de MIR docente, lo que tamién se diba traducir en sustituilos por profes en práctiques mal pagaos.

Los dos casos tienen pronósticu pesimista: los problemes educativos nun movilicen la sociedá. Les güelgues d’estudiantes entiéndense como disculpa pa mangala («piensa’l lladrón…») y les desgracies del profesoráu (¡esi gremiu implacable col que tol mundu tien alguna cuenta pendiente!) producen una fruición indisimulada. ¡Y mira que s’esfuerza l’administración por amigar les partes en conflictu! Si usté’tis lector de prensa atentu, ya vería nesti mediu, pocos díes atrás, cuánta delicadeza s’aprecia nes denominaciones pa los resultaos de delles pruebes escolares de nueva implantación. Los que les suspendan van recibir, como valoración, l’axetivu «iniciado».

Bon intentu. Pero, en realidá, lo que-y importa a la xente nesti tema son los edificios. Los neños tienen que tar recoyíos n’algún sitiu ensin goteres, con guarda y custodia, mientres el neoliberalismu trunfante esplota y/o deprime a los padres. Al respectu, permítame una anécdota de docente desengañáu con casi trenta años de serviciu. Esta mesma selmana, una madre acudió al institutu encesa, protestando’cause nun la avisáremos de que la fía adolescente tien mozu. Interpreto que, pa esa muyer, los profes somos, esencialmente, garantes de la (incierta) virxinidá de la neña que, a too esto, palmó la primer evaluación en pleno como una campeona. ¿Paez-y a usté prudente que-y digamos a la señora que la fía ta «iniciada»?

—¿Y qué sacamos d’esta historia? Les anécdotes nun tienen valor demostrativu.

Sí, ya lo sé. Ye que los retóricos antiguos aconseyen entemecer anécdotes ente argumentos. Pero paso ya a la peroración apocalíptica final:

Esto nun hai dios que lo igüe. Vivimos l’escurecer de les universidaes y de la cultura (que tampoco toi seguru que seyan coses que van de la mano). El conocimientu convirtióse en mercadería rentabilizable: nun diba ser la escepción. Les lleis y los modelos d’enseñanza que se diseñen (LODE, LOGSE, LOCE, LOE, LOMCE…) tán condenaos irremediablemente al fracasu’cause, ente otres coses, nun se consensúen colos axentes educativos principales (refiérome a Tele 5, claro).

Cuenta Heródoto que, nel imperiu persa, la única formación que se recibía, ente los cinco y los venti años, consistía en montar a caballu, tirar con arcu y nun contar mentires: la LOPE, Ley Orgánica Persa para la Educación. Abúltame un plan d’estudios admirable, muncho meyor que los nuestros. Persigue l’amor a la naturaleza, l’autocontrol y la honestidá. Según la LOPE, el ministru Wert, tocante polo menos a una de les materies, ya tien la nota puesta: «iniciado».

Advertisements

Dexa un retruque

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: