Coordenaes

La Nueva España, 21/03/2015

35 kilómetros ye la distancia que Google Maps mide ente la Cueva del Sidrón y Felechosa. 50.000 años, el tiempu que media ente’l presente y l’agonía del últimu neanderthal que pobló peles orielles del ríu Borines. Eses son les coordenaes espaciutemporales de la frustración.

En Felechosa celebróse, el miércoles 18 de febreru, un congresu sobre la caza. De los neanderthales de Piloña y otres partes esplicónos la ciencia, esi mesmu día, que nun diben desentonar gran cosa cola familia que nos tocó a caún na rifa. Tampoco nos garra de sorpresa, si somos sinceros.

Un investigador del CSIC, qu’acaba de publicar un estudiu sobre los nuestros primos «nea» nuna revista del ramu, declaró a los medios: «Hemos pasado de pensar en ellos como seres poco evolucionados a saber que cuidaban a los enfermos, enterraban a sus muertos, comían marisco e, incluso, tenían características físicas distintas a las esperadas: los había pelirrojos y de tez y ojos claros.»

Les tres coses, cuidar de los enfermos, enterrar los muertos y comer mariscu tán mui bien, pero vese que yo toi intelectualmente mui per detrás del científicu antropólogu, hasta mui perbaxo de los «nea», porque nun soi a cerrar el triángulu enfermedá-muerte-mariscu. O igual ye que se traiciona l’investigador y, revelando’l pasáu, revélase él gastronómicamente (vese que-y gusten más los centollos que les almóndigues y que ve más sofisticación n’abrir oricios a golpes nun pedreru pa saca-yos la güévara colos deos que n’esfollar un cabritu, facelu tayaes y cocinalu seliquín regándolu a cada poco con chimichurri) y estéticamente (paez dar a entender que Maureen O’Hara o Angela Merkel, roxes de güeyu claru, pertenecen a un momentu evolutivu superior o posterior al de Monica Belucci, por nun falar de Michelle Obama).

En Felechosa, el presidente de la Federación Asturiana de Caza dexó caer que, en llegando una previsible abondanza d’osos per estos altos y valles, bien se podía pensar en pega-yos tiros. Gran contestación por Internet de los lectores de La Nueva España. Encuesta urxente con resultáu abrumadoramente opuestu. La ciudadanía (polo menos la que consume prensa) nun comparte la pasión por ver, al traviés de la mira telescópica, cómo s’esbarrumba inerte, a doscientos metros, un animal que nun tenemos falta de comer pa matar la fame. Cazar osos podía ser un reclamu turísticu, argumenta’l presidente de la Federación. Face-yos l’amor seguramente tamién. Big Brother Bear, y a petalo.

Volviendo al Sidrón, el periódicu comenta, con prosa nun se sabe si del investigador del CSIC o del periodista al cargu, que los «nea» teníen «poca diferencia de altura y peso entre hembras y machos». Nun diz «hombres y mujeres», que lo yeren, como miembros del xéneru Homo. Machu y fema. Osu y osa. Neanderthal y neanderthala. 35 kilómetros y 50.000 años son les coordenaes espaciutemporales de la frustración.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: