Posesión infernal III

exorcista

Azahara Villacorta, l’audaz reportera d’El Comercio a la que sigo, en palabres de Benedetti y Carlos Lomas, con pasión glosemática, informónos hai poco a los lectores de la esistencia d’un exorcista oficiosu ente la curia ovetense. Benito Gallego, deán de la catedral, tien la responsabilidá de sacar el Diañu de los cuerpos asturianos. Si algún día coincido con Villacorta, a ver si m’acuerdo d’entruga-y si l’entrevistáu, o’l confesonariu onde se dexó retratar, atufaben a zúfere o a güevos podres… qué sé yo. Si a los que convivimos con perros, como nos descuidemos, apégasenos a la ropa’l golor a perrizu, digo yo qu’un exorcista tendrá qu’arrecender a diablizu, que  seguro que les fragancies malignes son más concentraes y puñeteres de quitar que les canines.

Según cuenta’l deán, la presencia maléfica delátase por una tendencia del posesu a blasfemar contra Dios, la Virxe y los santos y por espresase en términos inintelixibles pa l’audiencia. Ye, tal cual, lo que-y pasa a un tíu míu. Nosotros pensábemos que bebía, pero, polo visto, ta endemoniáu. El bichu debió invadilu de neñu, a traición. Un día cualquiera, el guaje que diba ser mio tíu bostezó (pudo ser na escuela, en clase d’Historia Sagrada, por poner un casu) y Satanás, qu’esperaba la ocasión camufláu dientro’l tinteru, aprovechó pa coláse-y hasta’l gañote, y p’abaxo. Cuando mio tíu, ya endemoniadín, cerró la boca fue p’articular un sonoru “¡Mecagondiós” que-y punxo los pelos de punta a la semeya perpía del caudillu. D’entós p’aquí, y ya va pa setenta años, too fue enriestrar cagondioses.

—¿Oísti, tíu?, tán los civiles poniéndose moraos a multes na retonda de La Chalana.

—¡Cagondiós!

—¡Meca! ¡Quemó la tortilla!

—¡Cagondiós!

—Un mol equival a 6,022 x1023 unidaes elementales, entiéndase átomos o molécules.

—¡Cagondiós!

Ta claro: mio tíu ta endemoniáu. Pero, a estes altures, yo soi partidariu de nun-y lo decir, más que nada pa que nun lleve un disgustu, probe paisanu.

Pero voi centrame nun puntu importante de les declaraciones del deán Gallego: l’últimu exorcismu que practicó fue en Xixón. Ya tamos colos localismos de siempre: l’exércitu de Dios n’Uviéu y el Diañu a ventipicu kilómetros. Vienme a la cabeza aquello que-y aconseyaba la güelina a una conocida carbayona cuando venía de moza a Xixón alguna noche de veranu: «¡Ten cuidáu, fiína, que nesi pueblu nun hai más que putes y marineros!» Y Satanás, señora, pa completar el ménage-à-trois. Pero, en Xixón, ya nun queden casi marineros en puertu nin putes nes calles. El Diañu tampoco debe salir muncho, porque yo nunca lu vi quemando colesterol pel Muru o comprando parroches na Plaza’l Sur. Pamidea, los diablos deben ser mui sedentarios, y toi pensando nel que tenemos adoptáu na familia de cuantayá, que nunca dio señales del movimientu más pequeñu, nin siquiera de pasar del cuerpu de mio tíu al de mio tía, y digo yo que más d’una ocasión y d’una vía debió tener.

El que desahució’l deán Gallego agarrábase con uñes y dientes a les coraes del güéspede y, según relataba’l clérigu a la reportera, fexo falta inmovilizar al posesu ente un montón de xente. Aguantábenlu pelos brazos y les piernes y el deán, infatigable, imprecaba latines enriba d’él. La operación llevó díes. A mí, la descripción recuérdame muncho un casu de detención ilegal y tortures, col agravante, más que probable, d’enfermedá mental o física de la víctima. Claro que, ¿qué sé yo de lleis? Lo mesmo que d’exorcismos: nada, que pa eso nun cursé’l minor correspondiente en Teoloxía, apud gradum Bononiae. El que sí tien que saber ye’l fiscal superior d’Asturies. Por eso, voi manda-y el recorte de prensa, por si nun lu vio, que lo mesmo-y interesa y, ya de pasu, salgo de duldes.

Anuncios

One Response to Posesión infernal III

  1. Capitan Bligh says:

    ¡Extraordinario, Milio!

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: