En globu

globu

Invítame Humberto Gonzali a subir en globu. Ye una esperiencia que me falta, como tantes otres, y pongo atención al ofrecimientu. Polo visto, el Festival Arcu Atlánticu, que se va celebrar esti veranu improblable en Xixón, cuenta poner peles nubes a un piñu d’asturcribientes. Respígome namás con sentir les esplicaciones.

—Paezme que va quedar pa otra vez —renuncio, pesie al apreciu que-y tengo a Humberto.

Y nun ye mieu a les altures. Lo que m’espanta ye la posibilidá de compartir la barquilla con colegues. Ye fácil d’entender: les barquilles más grandes nun pasen de siete metros cuadraos. Ehí dos escritores tropiecen, ta visto. Toi por dicir qu’ún solu tien que meter tripa. Pensar en subir a cinco o seis ye señal de sadismu (pero ya sabemos que Gonzali ye amante de los xéneros narrativos más arriesgaos). Cinco escritores (particularmente si practiquen el so noble arte nuna llingua como l’asturiana, fartucos d’escribir de perfil d’estrencha que ye), compartiendo globu aerostáticu a 500 metros d’altura, van esperimentar, inevitablemente, el síndrome del cuquiellu, que consiste en querer tirar pa fuera la barquilla a los demás ocupantes. Nesi trance violentu, onde caún garra al vecín de la culera p’aventalu percima la borda, los de más pesu (narradores de temática urbana) pueden pensar que  lleven les de ganar, pero tampoco ye cosa de fiase de los poetes menudos y resentíos col mercáu y la política de subvenciones, porque a esos nun-yos cuesta nada prender una cerilla y suicidar tola línea editorial englobada.

Y la xente, abaxo, que siempre mira pa les altures, embobao, cuando los aerostatos pintos floten calmosos nel cielu estival, diba llevantar un índiz apuntón y esclamar, viendo cómo van cayendo bultinos negros espatuxones:

—¡Mira! ¡Suelten lastre!

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: