Mt. 7. 15-16

Magnífico lo de los obispos falsos asturianos d’estos díes d’atrás. Ye una d’eses (poques) noticies poles que merez la pena abrir la prensa. Resúmo-yla por si nun ta al tantu: paez ser qu’anden ente nosotros un par de mitraos de pega, ún d’ellos recurrente, que lleva años echando la misa pa les fiestes de Robléu, en Piloña. Al otru, un francés que predicaba per Xixón y La Villa, veo agora mesmo n’Internet que lu acaben de detener (¿?).

Y el casu ye que’l conceptu d’obispu falsu ye resbariosu. Si estos impostores, por exemplu, lleen en misa l’Evanxeliu de san Mateo (“Guardáivos de los falsos profetas, que vienen a vosotros con vestíos d’oveya pero per dientro son llobos sangrinos. Polos sos frutos los vais conocer.”), ¿perderá validez la palabra de Cristo?, ¿será mentira que Cristo dixo tales palabres? Nun lo paez, a nun ser que tamién tengamos por falsariu a san Mateo. Si prediquen l’amor fraternu, ¿escurécen-y la virtú a un sentimientu tan cristianu? Si recen el padrenuestru cola parroquia, ¿será menos eficaz la oración en boca de feligreses engañaos? ¿Qué méritos tien la misa d’un obispu numerariu percima de la d’otru espontaniu?

Poniéndonos estupendos, podemos sentenciar que les falsificaciones, cuando agravien un Rolex, unes Ray-Ban, un bolsu Louis Vuitton, unos playeros Nike o unos vaqueros Levi’s, son transitives: plásmense nel oxetu delictivu, que-yos da esistencia.

Pero, ¿qué produz una falsificación espiritual? Les falsificaciones espirituales, como les de los obispos impostores, son intransitives, estériles. Nun dan copia ilexítima porque nun hai orixinal que copiar. La esencia de la falsificación, nestos casos, nun ta nel productu, sinon nel productor. Les palabres de san Mateo, 7. 16: “Polos sos frutos los vais conocer”, valen pa los chinos, pero non pa los obispos.

Anuncios

One Response to Mt. 7. 15-16

  1. Capitán Bligh says:

    El Señor sea loado.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: