El sillón y la poltrona

SourceURL:file://localhost/Users/milio/Desktop/Con%20poques%20hores%20de%20diferencia.doc
Con poques hores de diferencia, el presidente del gobiernu asturianu, Álvarez Cascos, llamó apoltronaos a los de la oposición, y Jesús Montes Estrada, “Churruca”, dimitió del cargu de coordinador d’Izquierda Xunida de Xixón afirmando, mui gallu, que tol mundu sabe qu’él nunca-y tuvo afición al sillón. Bueno, yo nun lo sabía… pero nun ye eso lo que m’interesa agora. Interésame esa coincidencia, a la derecha como a la izquierda, en denigrar la comodidá. Poltrona y sillón, en boca d’estos dos próceres, entiéndense como mobiliariu vergonzante. Y la boca d’ellos nun dexa de ser la boca del pueblu, que pueblu son a fin de cuentes. Despreciu lingüísticu asemeyáu nun se da con ningún otru tipu d’asientu: silla, sillín, butaca, butacón, taburete, bancu, banqueta, escañu, sofá, chaise-longue, el malditu puf, l’autóctona tayuela o’l más ruin tayuelu… ¿Y por qué esa zuna cola poltrona y el sillón? ¿Quién será tan tontu como pa querer más reposar nun tayuelu que nun sillón? (¡Y nun digo nada del puf, si ya yes mayor d’edá!) Paez como que la poltrona fuere a la banqueta lo mesmo que la prostitución al matrimoniu. Nun pue ser. Yo, a eso, nun me sumo. Al revés: abúltame que los amantes y detentadores del sillón tienen que contar cola admiración de la ciudadanía más razonable, por hedonista, atributos que van xuntos por necesidá. El que critique, señal de que lu come la envidia. Otro tanto pasa colos funcionarios, que somos la metáfora encarnada del sillón (o’l sillón la metáfora mobiliaria nuestra, que nun soi homocentrista). Home, otru cantar ye que’l sillón se convierta nuna torreta fronteriza, siempre espuesta al asaltu de los bárbaros, hasta’l puntu qu’una defensa agotadora del mueble acabe anulando les virtudes del reposu qu’ofrez. Entós entiendo que se renuncie a él, pero ensin denigralu, por nun caer nel ridículu de la raposa que nun podía comer les uves, don Francisco, camarada Churruca.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: